Thủ tướng sơkơ̆t hơdăh tơdrong lơ̆m apŭng plĕnh teh đei lơ tơdrong mơmat tat hrei ou, Việt Nam ling lang yak hơdoi kơjăp hăm Cuba, tơbăt dôm trong jang hlôh vao păng tơgŭm Cuba yak hloh tơdrong tơnap tap, atŏk kơtang jơhngơ̆m pran kơdih vă atŭm atŏk tơ iung. Thủ tướng Teh đak athei ƀar păh atŏk kơtang ăn khul kơdră tơƀơ̆p dih băl; iung jang hơdoi kơjăp tơlĕch jang kiơ̆ rim tơdrong drơ̆ng mĭnh nơ̆r iŏk đei lơ̆m ‘măng năm tơmang Cuba đơ̆ng Tổng Bí thư, Kơdră chĕp pơgơ̆r Teh đak Tô Lâm khei 9/2024. Kơdră jang tơbôl Cuba tơbăt jơhngơ̆m bơnê kơ tang đơ̆ng Đảng, teh đak păng kon pơlei Cuba găh tơdrong tơgoăt tơgoăl păng tơdrong tơgŭm djru đơ̆ng Việt Nam lơ̆m khei năr tơjê̆ ou, mă lơ̆m tơdrong choh jang sa păng sơđơ̆ng tơmam sa. Ƀar păh drơ̆ng mĭnh nơ̆r iung jang hơdoi tơlĕch jang kiơ̆ kơtang, jơnei rim trong jang ba tơgoăt tơgoăl jang muk drăm, mơdro sa, tơmơ̆t jên jang păng lơ tơdrong jang hơdoi anai atŏk tơ iung tơgăl hăm tơdrong tơgoăt tơgoăl chinh trĭ gĭt kăl, tơgŭm trŏ lăp ăn ‘măng atŏk tơ iung kơ ƀar teh đak.