Hop akŏm WEF Davos 'măng mă âu jĭ minh tơdrong kăp gĭt vă rim kơdră jang chĭnh trĭ păng jang tĕch pơdro lơ̆m apŭng plenh teh atŭm hăm khul kơpal tang măt ăn dôm jơnŭm jang tơpôl hop akŏm pơma đam gah tơdrong tơrĕk đơ̆ng tơpôl thŏng minh. Kiơ̆ kơ noh, ah hop akŏm, rim bơngai tang măt akŏm pơma đam gah tơrĕk đơ̆ng trĭ tuê̆ nhơ̆n tăo hăm hơtŏk mŭk drăm, tơdrong hơtŏk kơ jang kiơ̆ kŏng ngĭp, akŏm bơngai jang păng hơtŏk tơdrong hơbĕch ăn bơngai jang lơ̆m dôm hnam kơmăi păng anih jang mŭk drăm, adoi nhen hơmet pơ-'lơ̆ng đon lui lơ̆m jơnŭm jang apŭng plenh teh.

Lơ̆m 'măng năm pơm jang âu, Thủ tướng Phạm Minh Chính gô tơƀơ̆p hăm kơdră teh đak Thụy Sĩ vă pơma đam gah dôm trong jang hơtŏk tơbôl 2 pah păng hơtŏk jang hadoi kơ 2 teh đak, atŭm hăm noh tơƀơ̆p kơdră kơ dôm teh đak, rim anih jang apŭng plenh teh, anih jang mŭk drăm, rim anih asong jang pran lơ̆m kơpal teh.