Kiơ̆ tơroi tơbăt sơnăm 2024, anih jang tơbôl hlôi iŏk đei lơ jơnei gĭt kăl, tơgop vei kơjăp cham char rơngei, sơđơ̆ng păng jang hơdai ăn hơtŏk tơiung; hơnơ̆ng hơmet ming tơdrong jang tơbôl hiôk hian, hơnhăk tơdrong pơvei hăm dôm teh đak jang hơdai yak mơ̆t lơ̆m jrŭ să, ‘lơ̆ng, đei yua. Thủ tướng Phạm Minh Chính chih iŏk, pôk pơ ư păng hmach hơiă kơ Anih tơm jang tơbôl păng dôm Anih jang tang măt Việt Nam tơ̆ teh đak đe hlôi jang hơdai kơjăp hăm dôm anih tơm, anih jang, tơring, anih mơdro sa tơlĕch jang ‘lơ̆ng, tơtom, đei yua dôm hơnăp jang tơbôl, tơgop lơ̆m jơnei atŭm kơ lơ̆m teh đak sơnăm 2024.

Thủ tướng athei đĭ đăng anih jang tơbôl hơnơ̆ng hơtŏk loi dơ̆ng jang hơdai, tơlĕch jang hrơ̆ch 1 ‘măng, pơcheh hơgei, đei yua dôm tơdrong jang tơbôl Đảng, jang tơbôl Teh đak păng jang tơbôl Kon pơlei, jang tơbôl đơ̆ng rim kơdră; pơjing jang tơbôl ‘nao păng hơgei; pơjing Đảng rơgoh, pran kơjăp; hơtŏk ‘lơ̆ng tơdrong jang chĕp kơ̆l păng jơhngơ̆m iung jang đơ̆ng dôm khŭl jang đảng, đảng viên lơ̆m anih jang Tơbôl.