Tơ̆ ‘măng hop akŏm hơdai, Thủ tướng Phạm Minh Chính pơma hơdăh tơdrong gĭt kăl đơ̆ng tơdrong chă hơdrin kơdih, pơm tơ ‘ngla tơdrong jang hăm rim teh đak, rim khŭl jang lơ̆m apŭng plĕnh teh, lơ̆m noh đei Việt Nam păng ASEAN. Kiơ̆ kơ Thủ tướng Phạm Minh Chính, tơdrong ‘nâu đei tơƀôh tơ̆ tơdrong hơtŏ băl lơ̆m tơdrong pơvei tơbôl kiơ̆ lơ̆m khôi luơ̆t vă pơm hơnih hiôk ăn hơtŏk tơiung; tơdrong hơtŏk tơiung găh mŭk drăm vă hoei kơ đei tơ jur; khŭl lĭnh, sơđơ̆ng đei hơmet ming lăp hăm tơdrong yan âu; vei sơđơ̆ng tơdrong hơrih sa tơpôl vă hoei kơ đei bu đei hŭt lê̆ tơ̆ rŏng, ưh kơ hŭt jơhngơ̆m tơpôl vă hơtŏk tơiung mŭk drăm hơdrô̆; chĕp răk, tơƀăk mong tơdrong joăt oei sa ‘lơ̆ng hơiă đơ̆ng rŏ.

Mă loi ‘noh hăm tơdrong hơtŏk hơnăp jang tơm đơ̆ng ASEAN, Thủ tướng Phạm Minh Chính pơma hơdăh, ASEAN athei tơƀôh hơdăh hơnăp jang tơm tơ̆ lơ̆m grŭp jang hơdai, găh tơdrong ƀơm truh tơblăh tơblŭng, ƀơm truh tơdrong kơhret, ƀơm truh dôm tơdrong apŭng plĕnh teh hrei ‘nâu. Kiơ̆ Thủ tướng Phạm Minh Chính, mă hơdrol rim teh đak đei 1 trong jang tơgŭm, bơ̆jang păng hơnhăk ăn đei yua ăn tơdrong rơngei jang hơdai păng hơtŏk tơiung hrei ‘nâu lơ̆m apŭng plĕnh teh; mă 2 ASEAN athei akŏm hơdai dôm jơnei đơ̆ng dôm teh đak lơ̆m ASEAN vă tơƀôh tơdrong hơiă pơm tơdrong ‘lơ̆ng ăn rim tơring nai, ăn kơ dôm teh đak lơ̆m apŭng plĕnh teh.