Ƀlep ƀơ̆t tơbăt 94 sơnăm năr pơjing Khŭl hơdruh tơdăm Cộng sản Hồ Chí Minh (26/3/1931 – 26/3/2025), gơmăng 23/3, tơ̆ Hà Nội, Thủ tướng Phạm Minh Chính vang truh pơm Lêh pơjao tơmam hơpăh sơnăm mơlôh Việt Nam hơgei sơnăm 2024, hăm hơnăn "Hơnăp jang ang hơdăh” yua đơ̆ng Trung ương Khŭl hơdruh tơdăm Cộng sản Hồ Chí Minh, Anih mong jên tơgŭm tơdrong gơh hơgei đơ̆ng sơnăm mơlôh Việt Nam, Anih pơdăh tivi Việt Nam jang hơdai pơgơ̆r. Sơnăm 2024, Khŭl pơgơ̆r hơpăh tơmam hlôi iŏk đei 159 hla ar hô sơ rơih ăn đơ̆ng 55 anih jang lơ̆m teh đak.

Khŭl hơpăh tơmam hlôi tơchă đei 10 ‘nu bơngai mơlôh Việt Nam hơgei păng 8 ‘nu bơngai mơlôh Việt Nam hơmĕng đei jang ‘lơ̆ng, gơh hơgei lơ̆m rim tơdrong jang: Hŏk pơhrăm; Tơchĕng hơlen khoa hŏk - pơcheh hơgei; Jang sa pơm tơlĕch; Tĕch mơdro - pơjing tơdrong jang sa; Vei lăng sơđơ̆ng teh đak, Tơplŏng kơdâu; Bơ̆jang tơpôl; Joh ayŏ kơdŏ soang; Vei lăng bơ̆jang Teh đak hlôi đei pôk pơ ư. Thủ tướng Phạm Minh Chính chơt hơiă vang truh pơm lêh pôk pơ ư tơdrong gơh hơgei đơ̆ng sơnăm mơlôh - dôm tơ ‘ngla tơ̆ hơnăp kơnh kơ teh đak, hăm hơnăp jang ‘noh jĭ iung jang, bơngai jang năm hơdrol păng jơhngơ̆m đon “Sơnăm mơlôh Việt Nam ‘nă hal, kơjăp lui kiơ̆ Đảng” hơnhăk teh đak yak mơ̆t lơ̆m chăl ‘nao. Thủ tướng ‘meh vă Hơdruh tơdăm Việt Nam athei akŏm bơ̆jang kiơ̆ hơtŏ băl, hơgei lơ̆m tơpôl, vei sơđơ̆ng tơdrong hơrih sa tơpôl, hơtŏk ‘lơ̆ng tơdrong hơrih sa kon pơlei, jang ‘lơ̆ng dôm trong tơjur jang, tơgŭm đơ̆ng Đảng, teh đak găh vei sơđơ̆ng tơdrong hơrih sa tơpôl, mă loi ‘noh jĭ gơh băt hơtŏ băl găh pơtho pơhrăm, jang pơgang tơ̆ rim tơring lơ̆m teh đak, truh hăm rim tơpôl, rim ŭnh hnam păng rim kon pơlei, mă loi ‘noh jĭ tơring groi kông, tơring hơtăih hơtŏ, tơring sơlam, achon đak dơsĭ hăm jơhngơ̆m đon “ưh kơ lê̆ bu đei hŭt lê̆ tơ̆ rŏng”.