Pơma tơ̆ hop akom, Thủ tướng Phạm Minh Chính pơma hơdăh, ‘mĕh jang tŏk athei hơtŏk kơsư̆k bơ̆ jang, ‘moi kiơ̆ đơ̆ng atŏk tơiung khoa hŏk kơmăy kơmŏk, tơplih ‘nao, tơplih hăm kơmăy sô̆, pơjing khul jang rơgei; pơtho pơhrăm, khoa hŏk kơmăy kơmŏk jĭ trong jang tơm kơ teh đak; tơmât jên ăn khoa hŏk kơmăy kơmŏk, pơtho pơhrăm ‘nŏh jĭ tơmât jên ăn tơdong jang tŏk.

Đơ̆ng rŏng kơ mơ̆ng lơ nơ̆r pơma, hơtuch hop akŏm, Thủ tướng Phạm Minh Chính pơma hơdăh: Bơ̆n tơplih ming tơdrong pơhnŏng jang tŏk truh 8% vă akŏm jơhngâm ăn tơdrong jang atŏk tơiung khoa hŏk, kơmăy kơmŏk, tơplih hăm kơmăy sô̆, tơplih ‘nao tơdrong pơcheh păng pơtho ăn khul bơngai jang rơgei vă tưk tơiung tơdrong jang tŏk. Thủ tướng pơma hơdăh, atŏk tơiung khoa hŏk, kơmăy kơmok, tơplih hăm kơmăy sô̆, tơplih ‘nao păng khul jang rơgei vă jang tŏk mŭk drăm, ‘nŏh jĭ tơdrong gĭt kăl, jĭ trong rơih jang đunh đai, vă pơ ‘nhŏ jang hơdrol păng iŏk kon pơlei pơm tơm, pơm tơ ‘ngla. Atŏk tơiung khoa hŏk, kơmăy kơmŏk, tơplih ‘nao rơgei, tơplih hăm kơmăy sô̆ păng pơjing khul jang rơgei vang tơgop hơmet ming tơdrong jang mŭk drăm, jang tŏk hrĕnh păng kơjăp ‘lơ̆ng.