Kiơ̆ tơroi tơbăt đơ̆ng Anih tơm Chĭnh trĭ, tơdrong mŭk drăm - tơpôl 2 khei iŏk đei jơnei ‘lơ̆ng, ‘lơ̆ng hloh kơ khei hơdrol păng khei ‘nâu sơnăm sơ̆; kon pơlei, anih mơdro sa, bơngai tơmơ̆t jên jang lơ̆m păng ‘ngoăih teh đak, dôm tơdrong tơchơ̆t jên hu, pơgơ̆r dơ̆ng pơrĕng tơdrong lui ngeh đơ̆ng apŭng plĕnh teh. Thu mong jên jang teh đak đei 25,4% tơchĕng jô̆ hơdrol, tŏk 25,7% pơting hăm khei ‘nâu kơ sơnăm hơdrol. Jên tĕch tơlĕch, răt tơmơ̆t tơ̆ teh đak đe 2 khei tŏk 12% pơting hăm khei ‘nâu kơ sơnăm hơdrol. Tơ̆ ‘măng hop akŏm, dôm bơngai jang lơ̆m Khŭl kơdră teh đak hlôi ăn tơgop nơ̆r pơma dơnuh vă hơlen lăng găh tơdrong mŭk drăm - tơpôl khei 2 păng 2 khei; dôm tơdrong jang tơm kơ teh đak; tơdrong tơlĕch jên tơmơt jên jang teh đak.

Thủ tướng athei dôm bơngai tang măt tơlĕch dôm tơdrong tơm chĕp kơ̆l, pơgơ̆r, vei lăng tơ̆ hơnăp kơnh vă sơnăm 2025 athei tŏk hloh 8%, tơgop gĭt kăl bơ̆jang kiơ̆ jơnei Trong tơlĕch jang hơtŏk tơiung mŭk drăm tơ pôl 5 sơnăm đơ̆ng sơnăm 2021-2025, pơm tơdrong ‘lơ̆ng ‘nao vă teh đak yak kơjăp mơ̆t lơ̆m chăl ‘nao, chăl jang tŏk, pơjing teh đak pơdrŏng pran, hơgei, hơnŭk hơnoa, kon pơlei phĭ tơnŏ, hiôk chơt.