‘Măng hop akŏm hlôi akŏm pơma dơnuh găh tơdrong pơtôch bơ̆ jang kơ Hơnih jang vei lăng kon jên jang Teh đak tơ̆ hơnih mơdro sa păng tơdrong hơnăp jang kơ bơngai tang măt tơ-‘ngla pơm tơm teh đak hăm 19 grŭp jang, kŏng ty; tơdrong hơmet ming, pơm kơtoei khul kơdră Hơnih tơm jang jô̆ hơlen. Lăp đơ̆ng rŏng mơ̆ng rim nơ̆r tơgop, iung pơma pơtôch hop akŏm, Thủ tướng Phạm Minh Chính tơbăt, lơ̆m atŏk tơ iung, khul kơdră teh đak hlôi jang kiơ̆ rim trong jang phara dih băl lơ̆m vei lăng hơnih mơdro sa Teh đak, vei lăng kon jên jang Teh đak lơ̆m hơnih mơdro sa trŏ lăp kiơ̆ chăl jang. Kiơ̆ đơ̆ng Thủ tướng Teh đak, sơnăm 2025, lơ̆m teh đak hơdrin tŏk mŭk drăm tŏ sĕt hloh 8%, pơjing hơyak pran ăn chăl atŏk tơ iung 2 kơsô̆ dơ̆ng. Kơ yuơ lơ loh rim hơnih tơm, hơnih bơ̆ jang, tơring tơrang, hơnih mơdro sa kăl tŏk tŏ sĕt hloh 8%; hơmet ming trong jang, hơnih jang kơ rim grup jang, Tổng kŏng ty Teh đak kăl kiơ̆ trong “lăng tơdrong đei iŏk yua ăn teh đak, hơdrĕch hơdrung ‘noh kăl hloh, blŭng hloh" vă kon jên jang Teh đak đei vei lăng ‘lơ̆ng hloh păng atok tơ iung ‘lơ̆ng hloh, tơgŭm ăn atŏk tơ iung teh đak lơ̆m chăl ‘nao.