Pơtruh nơ̆r ah pơma đam, Thủ tướng Phạm Minh Chính bơnê kơ tơdrong tơroi tơpăt gah tơdrong hơpơi 'meh đơ̆ng dôm anih jang mŭk drăm Hàn Quốc, tơƀôh tơdrong hlôh vao, lui ngeh hăm dih băl. Thủ tướng hơpơi 'meh rim anih jang mŭk drăm Hàn Quốc hlôi jang tơnăp noh athei jang tơnăp hloh dơ̆ng, tơgŭm ăn Việt Nam hơtŏk tenh kơjăp sơđơ̆ng nhen đe buăl hlôi pơm jang tơ̆ teh đak kơdih, tơgop gah trong pơm jang vă vei sơđơ̆ng hiôk hian.

Atŭm hăm noh pơtoi pơih să asong pơm jang tĕch pơdro tơ̆ Việt Nam păng lăng Việt Nam jĭ anih asong jang tơm, tơgŭm Việt Nam vang jang kơjăp hloh lơ̆m tơdrong asong jang lơ̆m kơpal teh, pơm tơlĕch lơ tơmam drăm 'lơ̆ng; tơgop hơtŏk gah kơmăi kơmŏk, pơtho bơngai jang, tơgop lơ̆m tơdrong vei lăng jơnŭm pơgơ̆r jang mă trŏ ƀlep hăm tơdrong hơtŏk tơ-iung kơ apŭng plenh teh păng kơ Việt Nam. Mă kăl noh asong jang gah joh ayŏ tơmang pơhiơ̆, kơmăi kơmŏk kơsô̆, pơ-'lơ̆ng cham char, gah kơ̆l 'ngok kơmăi kơmŏk hơgei 'nâu nai hia.