Tơ̆ dôm ‘măng tơƀâp, pơma đam, pơma muh, Kơdră chĕp kơ̆l Việt Nam tơchĕng ‘lơ̆ng Thủ tướng Adylbek Kasymaliev păng khul tang măt ăn teh đak Kyrgyzstan năm ngôi tơ̆ Việt Nam, lui ‘măng năm ngôi vă pơih xă jăl ‘nao ăn tơdrong jang tơbôl păng jang hơdoi lơ tơdrong đơ̆ng 2 teh đak; pơma hơdăh Việt Nam năng kăl tơdrong pơvei ‘lơ̆ng hăm Kyrgyzstan.

Adrol kơ ‘nŏh, Thủ tướng Phạm Minh Chính păng Thủ tướng Adylbek Kasymaliev năm ngôi tơ̆ Anih bơ̆ jang kơ Ƀok Hô lơ̆m Anih jang kơ ƀok Kơdră teh đak tơ̆ Hà Nội. Thủ tướng Phạm Minh Chính roi tơbăt ăn Thủ tướng Kyrgzystan Adylbek Kasymaliev găh hnam kơjung Ƀok Hô, kŭm hăm tơdrong arih păng tơdrong jang đơ̆ng Ƀok Hô, kŭm nhen trong jang tơbôl păng tơdrong jŏh ayŏ kơdŏ xoang ‘lơ̆ng hơiă, kơtang nuih mơng đơ̆ng hơdrĕch Việt Nam, kiơ̆ đơ̆ng lơ tơmam, um rup nhen đak păng unh, hơgơ̆r kong Đông Sơn, ‘long kram Việt Nam, ao tai Việt Nam păng che bronh Tơring Pơbăh…tơ̆ anih gru groa.