Tơ̆ hop akŏm, rim kơdră jang lơ̆m Khul kơdră chĕp pơgơ̆r Teh đak pơma dơnuh lăng hơlen, ăn tơgop nơ̆r, pơdrơ̆ng kiơ̆ hăm 4 tơdrong vă pơjing Khôi luơ̆t đei: Khôi luơ̆t bơ̆ jang Khul kơdră Teh đak (hơmet ming); Khôi luơ̆t bơ̆ jang Khul kơdră tơring (hơmet ming); Khôi luơ̆t pơm tơlĕch hla bơar tơchơ̆t (hơmet ming); Khôi luơ̆t vang iung jang khul lĭnh vei lăng rơngei hiôk hian Liên hợp quốc. Iung pơma tơ̆ hop akŏm, Thủ tướng Phạm Minh Chính sơkơ̆t hơdăh, ‘nou dôm trong vă pơjing khôi luơ̆t, tơdrong tơchơ̆t kăl, vă tơtom hơmet pơ ‘lơ̆ng jang kiơ̆ hloi rim trong tơlĕch jang tih tên đơ̆ng Đảng găh tơplih ‘nao hơnih jang, tơdrong bơ̆ jang kơ Khul kơdră Teh đak, khul kơdră tơring kiơ̆ trong “Gơ̆h hơgei-kơtoei-pran kơtang-bơ̆ jang ‘lơ̆ng-jơnei hơ iă". Jơ ‘năr ưh kơ đei, pơkoel kơtang, tơdrong lơ, tơdrong tơnap, Thủ tướng athei rim kơdră lơ̆m Khul kơdră Teh đak akŏm jơhngơ̆m đon, đŏk tơbăt, tơgop nơ̆r kơđeh, tôm tong, trŏ lăp, năm tơpăt găh tơdrong hloi; akŏm pơma dơnuh găh rim tơdrong kăl, oei đei nơ̆r tơgop phara dih băl kăl pơma dơnuh, apĭnh nơ̆r tơgop đơ̆ng khul kơdră Teh đak; sơđơ̆ng ƀlep ‘lơ̆ng, jơ ‘năr pơkăp hop akŏm.