Thủ tướng tơroi hăm kon pơlei băt gah tơdrong đei ƀôh lơ̆m teh đak ah sơnăm 2024, Việt Nam hlôi đei jơnei dôm tơdrong jang kăp gĭt, keh đang tôm 15 tơchơ̆t hơtŏk mŭk drăm – tơpôl, lơ̆m noh 12 tơchơ̆t hloh kơ tơdrong tơlĕch jang. Hơtŏk jang GDP sơnăm 2024 đei 7,09%, đei yua GDP truh 476 tih đôlar, lơ̆m grŭp 35 teh đak jang mŭk drăm pran hloh lơ̆m apŭng plenh teh. Việt Nam pơtoi sơđơ̆ng tơdrong jang mŭk drăm, hơlen tang găn tơdrong huach kư̆ kă, vei sơđơ̆ng tơdrong hơtŏ hơnơ̆ng.

Ƀơ̆t 'măng âu, Thủ tướng chơt hơ-iă tơroi hăm kon pơlei Việt Nam tơ̆ Séc gah tơdrong mă Anih jang Trung ương Măt trâ̆n Tôh kuôk Việt Nam hlôi tơchơ̆t rơih Praha jĭ anih pơgơ̆r Năr akŏm Tơguăt tơguăl tôm kon pơlei tơ̆ teh đak đe pơgơ̆r 'măng blŭng; tơƀôh tơdrong hmach bơnê hăm dôm tơdrong tơgop đơ̆ng kon pơlei Việt tơ̆ Séc. Thủ tướng hơpơi 'meh kon pơlei pơm kiơ̆ tơnăp khôi luơ̆t tơ̆ teh đak oei hơrih jang xa, tơguăt tơguăl, tơgŭm dih băl, pơm kiơ̆ pơkăp “tơgŭm dih băl”, “đon bơnôh kon pơlei pơla”, mă kăl noh lơ̆m khei năr tơnap tap, sar bar.