Pơma ah hop akŏm, Thủ tướng Phạm Minh Chính ră hơdah, tơbôl Việt Nam - Lào jĭ tơdrong tơbôl kăp gĭt hloh, kơyuơ noh athei đei trong oei xa kăp gĭt hloh, đơ̆ng plei nuih truh plei nuih, athei đei sơnong tơnăp hăm dih băl. Hăm pơkăp "tơgŭm boăl noh tơgŭm dơh po", Thủ tướng hơvơn anih jang mŭk drăm kơ 2 teh đak tơguăt tơguăl drơ̆ng minh, tơgŭm dih băl vă atŭm hơtŏk tơ-iung.

Gah po Thủ tướng Lào Sonexay Siphandone ăn tơbăt, khei năr truh, 2 pah gô pơtoi pơklaih dôm tơhlăk tơhlĭn păng tơlĕch ming man trong nơnăm, trong gre treng, dơnŏk duk Vũng Áng, hơtŏk dôm tơdrong jang pơm tơlĕch tơmam drăm choh pơtăm. Thủ tướng Lào hơpơi 'meh, anih jang mŭk drăm kơ 2 teh đak pơtoi asong jang tĕch pơdro tơ̆ Lào păng Việt Nam, iŏk yua tơnăp mŭk drăm, tơdrong pran kơ 2 pah vă hơ-'nhăk tơdrong phĭ tơtŏ dơnŏ 'lơ̆ng ăn kon pơlei rim teh đak.