Tơdrong akŏm kơyuơ Anih jang đoan dêh char, Jơnŭm jang đe Hơdruh tơdăm Việt Nam dêh char Gia Lai jang atŭm hăm Jơnŭm jang đe Hơdruh tơdăm Việt Nam kuâ̆n 12, pơlei tơm Hồ Chí Minh pơgơ̆r. Tơ̆ Hnam trưng Jăl kơ đeh Võ Văn Kiệt, xah Ia Dơk, apŭng Đức Cơ, tơdrong chơt hơ-iă hăm Năr akŏm sơnăm mơlôh ăn đe hơ-ioh. Jơnŭm pơgơ̆r hlôi asong lơ tơmam pôk kăp gĭt nhen: ming hơmet hnam tơguăt tơguăl ăn unh hnam tơnap tap, pơjao 1.000 kơsơ̆p hla bar chih ăn Anih jang đoan apŭng Đức Cơ vă pơm kiơ̆ Tơdrong tơlĕch jang “Kơyuơ đe hơ-ioh 'mêm kơ-eng”; 5 suơ̆t jên hŏk ăn hŏk tro tơnap tap yak hloh tơnap tap hŏk pơhrăm hơgei păng 20 tơpu tơmam ăn hŏk tro đei tơdrong hơrih tơnap tap.

Tơ̆ xah sơlam Ia Dom, tơdrong akŏm pơgơ̆r lơ tơdrong jang kăp gĭt: asong 400 tŏ hla kơ Teh đak, 30 kơthŭng đak toh ăn hơ-ioh, 50 tơpu tơmam ăn unh hnam tơnap tap păng pơtơm tơdrong jang "Tơ̆k hơdah trong sơlam teh". Atŭm hăm noh, 200 kon pơlei đei khăm hơmet jĭ ưh huach jên.