‘Nhŏng Y Sim Kbuôr oei tơ̆ tơring Hòa Xuân, pơlei tơm Buôn Ma Thuột, ‘noh bơngai jang lơ̆m Công ty Cổ phần Thép ASEAN lơ̆m Hơnih jang Kmăi kmŏk Hòa Phú đơ̆ng sơnăm 2020. Tơ̆ Hơnih bơ̆ jang đei chi ƀô̆ đảng, ‘nhŏng hlôi hơdrin vă đei mơ̆t lơ̆m khul Đảng păng đei jing đảng viên lơ̆m khei 9/2024. ‘Nhŏng Y Sim Kbuôr tơroi, ‘nou jĭ tơdrong chơt hơ iă ‘nă hal ưh khan lăp hơdrô̆ kơdih ba mă lei hăm ŭnh hnam bơ̆n dơ̆ng. “Ba jang lơ̆m Kŏng ty kon pơlei mă lei đei pôk tơmơ̆t jang lơ̆m Đảng ‘noh ŭnh hnam bơ̆n bu bu jei chrih kơ đon, hưch hanh hơmanh bơnê tơpă mơ̆n. Jĭ bơngai đảng viên ‘noh ba gô jang ‘lơ̆ng hloh dơ̆ng păng pơm jŭk yuk trong hơlou rim tơdrong jang.” 

Atŭm hăm kŏng nhân tơ̆ Công ty Cổ phần Thép ASEAN, đảng viên Y Hoan Ktul oei jang lơ̆m khul chĕp pơgơ̆r chi ƀô̆ công ty jăl jang 2020–2025. Pơm jŭk yŭk trong hơlou lơ̆m rim tơdrong jang, Y Hoan đei chi ƀô̆ pơjao vei lăng năng tông dôm bơngai ‘lơ̆ng tơnăp vă tơmơ̆t Đảng lơ̆m khei năr kơnh.“Ba hơnơ̆ng pơtho khan ‘nhŏng oh lơ̆m khul, mă kăl dôm ‘nhŏng poh bơngai Êđê, kăl hơdrin hŏk pơhrăm, jang tơnăp, vang iung jang rim tơdrong mă Kŏng ty pơgơ̆r, jang ‘lơ̆ng dôm tơdrong pơjao, pơm tơlĕch tôm mam pơsei kiơ̆ pơkăp tĕch mơdro hăm đe. Tơdăh jang ‘lơ̆ng păng ‘meh vă mơt lơ̆m Đảng lei gô đei pôk tơmơ̆t lơ̆m Đảng hloi.”

Chi ƀô̆ đảng Công ty Cổ phần Thép ASEAN đđei pơjing sơnăm 2017, ‘măng mă blŭng đei 5 ‘nu đảng viên, truh dang ei hlôi tơmơ̆t đei 25 ‘nu. Ƀok Trần Trung Tiến - Ƀĭ thư Chi ƀô̆ tơbăt, đei tơdrong lăng ba đơ̆ng Khul kơdră Kŏng ty, sơnăm ayơ chi ƀô̆ jei tơmơt đei 3 - 4 ‘nu đảng viên ‘nao, lơ hloh trong pơjao. Ƀok Trần Trung Tiến tơroi, chi ƀô̆ tŏk bŏk hơdrin atŏk tơ iung đei jing Đảng ƀô̆ lơ̆m sơnăm 2026: “Lơ̆m sơnăm 2025, chi ƀô̆ hơdrin pôk tơmơ̆t đơ̆ng 3 truh 5 ‘nu đảng viên, kiơ̆ trong pơjao đơ̆ng Khul Kơdră Đảng Khul rim Hơnih bơ̆ jang păng Hơnih mơdro sa dêh char Dak Lăk. Nhôn hlôi tơ iung pơjing khul, pơtho chih hla bơar li lĭch, năm hơlen hla bơar păng tŏk bŏk gô chang kĭ tơchơ̆t vă pơgơ̆r pơm lêh pôk tơmơ̆t lơ̆m jăl I sơnăm 2025 hăm 2 ‘nu bơngai.”

Ƀok Trần Quang Tân, Kơ iĕng Ƀĭ thu Đảng Khul rim Hơnih bơ̆ jang păng Hơnih mơdro sa dêh char Dak Lăk tơbăt, lơm dêh char dang ei đei 11 khul Đảng lơ̆m rim hơnih mơdro sa kon pơlei, hăm 537 đảng viên. Khei năr ou ki, bơ̆ jang atŏk tơ iung Đảng tơ̆ rim Hơnih mơdro sa kơ kon pơlei hlôi iŏk đei jơnei hơ iă, tơgop tơgŭm ăn rim hơnih mơdro sa bơ̆ jang sơđơ̆ng, tơgŭm Đảng tơklep tơjê̆ hloh hăm rim khul, rim hơnih jang Mŭk drăm. Ƀok Trần Quang Tân tơbăt:“Rim sơnăm, nhôn hơdrin pôk tơmơ̆t đơ̆ng 16 đảng viên năm tơ̆ lơ lơ̆m khul hơnih mơdro sa tơm kơ kon pơlei, lơ̆m ou đei đơ̆ng 1-2 đảng viên ‘noh bơngai chep kơl hơnih mơdroi sa. Truh sơnăm 2030, nhôn gô tơ iung pơjing dơ̆ng đơ̆ng 2-3 khul Đảng păng 1–2 khul hơdruh tơdăm, khul ƀô̆ đô̆i so. Tŏ sĕt hloh 8% hơnih mơdro sa tơm kơ kon pơlei lơ̆m dêh char gô đei Khul Đảng păng đei bơngai đảng viên ‘noh kơdră chĕp pơgơ̆r hơnih mơdro sa.”

Bơ̆ jang atŏk tơ iung Đảng lơ̆m khul hơnih mơdro sa tơm kon pơlei tơ̆ Dak Lăk hlôi đei tơdrong jang hơ iă, tơgop kơtang pơjing đei bơ̆ jang sơđơ̆ng, jơnei, tơgop lơ̆m atŏk tơ iung chinh trĭ, muk drăm păng tơpôl dêh char Dak Lăk roi năr roi atŏk tơ iung.