Chông kon năm jơ̆ng hoh rok brih mir cheh phe tŏk bŏk pơyan pơkao chôh tơbŭk tơ̆ 1 hơnih tơmang lăng choh jang sa tơ̆ Đắk Lắk, mŏ Nguyễn Thị Phương Phương, oei tơ̆ pơlei tơm Đà Lạt, dêh char Lâm Đồng chă ngưih lăng pơkao cheh phe ƀâu phu, tơƀôh răh ăn kơ kon sư lăng kơdrot tŏk bŏk trep pơkao. Mŏ Phương tơroi, kơdih kŭm hlôi jing kon pơlei jang cheh phe kơna mưh pơyan pơkao thoi âu ‘noh ƀlŏk rơngươ̆ kơ đơ̆ng sơ̆.

“Pơgar cheh phe hăm lơ pơkao păng ƀâu phu ‘lơ̆ng ‘noh ƀôh găh 1 pơyan phĭ tơnŏ vă jê̆ truh oei đei ƀôh lơ̆m ĭnh kơna ĭnh tôch kơ hơiă. Hnam nhôn ưh pă đei mir kơna dang ei đei kon ‘lơ̆p ‘noh ĭnh oei đa năm truh tơ̆ dôm hơnih thoi ‘nâu, đei pơkao, đei ‘long cheh phe vă kơ đe kon gơh băt, gơh ƀôh tơdrong ‘lơ̆ng hơiă joăt joe kŭm nhen tŏ ‘mi kial tơ̆ Tây Nguyên”.

Hăm ‘năr tŏ hiôk, kŭm hăm cheh phe, lơ kơ loăi ‘long lơ̆m cham char tơ̆ Đắk Lắk păng pơđĭ Tây Nguyên kŭm bluh tơ mơ̆ng, lĕch pơkao, khei 3 jing “pơyan sut kơdrot chă năm trep pơkao”. Tơgĕch iŏk tơdrong đei yua âu, lơ anih jang pơm tơmang lăng tơ̆ tơring hlôi pơm dôm tơdrong jang tơmang lăng tơklep hăm chă lăng vă kơbăt tơdrong oei sa đơ̆ng sơ̆ păng mơ̆t hơdai hăm tơdrong choh jang sa đơ̆ng kon pơlei jang chŭn mir. Hơdai hăm cheh phe, dôm hơnih chă lăng ‘lơ̆ng rŏ, hơnih tơmang lăng ‘lơ̆ng hơdrô̆ tơ̆ Đắk Lắk kŭm pơm ăn tơmoi hưch hanh. Ƀok Lò Hải Phan, oei tơ̆ pơlei tơm Sơn La, dêh char Sơn La roi tơbăt:

“Chă năm tơmang lăng ‘măng âu ‘noh 5 măng 4 năr, năm tơ̆ dôm hơnih tơm, 1,2 hơnih so jơhnơr hơrih tơ̆ pơlei tơm Buôn Ma Thuột, đang kơ ‘noh năm tơ̆ Buôn Đôn, năm tơ̆ chơ kơi đak Drai Nur. Ƀôh tôch ‘lơ̆ng hơiă, mă loi ‘noh jĭ 1 tơring tă kơ đei 1 hơnih pha ra băl, jô̆ hloi dôm tơmam sa tôch kơ trŏ lăp”.

Oei ƀok Nguyễn Đình Hùng, truh đơ̆ng anih tơm Hà Nội ‘noh lăng ƀôh:

“Truh tơ̆ Đắk Lắk ‘noh ĭnh đei năm lăng tơ̆ Hơnih ‘măn răk tơmam drăm so Đắk Lắk, Plei chephhe Trung Nguyên, hơnih tơmang lăng Ko Tam, truh tơ̆ dơdâu Lắk. Ĭnh ƀôh tôch kơ hơiă, ‘năr tơ̆ âu tôch kơ rơ ngơp, hiôk păng kon pơlei tôch kơ hơlăng. Pơđĭ hloi bơ̆n rôih kŭm pơm ăn tơdrong hơiă hơnat vă hiơt, tôch kơ hơiă”.

 Lơ̆m tơdrong chă năm ngôi lăng cham char bri brăh, tơmoi truh tơ̆ Đắk Lắk kŭm đei chă lăng tơdrong oei sa ‘lơ̆ng hơiă đơ̆ng sơ̆ kơ dôm hơdrĕch kon kông kơtă hơnih. Tơ̆ dôm hơnih tơmang lăng lơ̆m tơpôl, tơmang lăng găh tơdrong joăt oei sa ‘lơ̆ng hơiă, dôm kơjă kăp gĭt ‘lơ̆ng hơiă đơ̆ng rim hơdrĕch kon kông đei pơgơ̆r, jing hơnih hơiă sơng tơmoi tơmang lăng. Yă Trần Thị Kim Ánh, Kơdră vei lăng Hơnih tơmang lăng tơ̆ apŭng Buôn Đôn tơroi:

“Hơdai hăm tơdrong lăng rôih, oei pơgơ̆r pơlong hao thŏng an Kazak tơ̆ đak krong Sêrêpốk, kŭm hăm dôm tơdrong pơvih pơvăn tơmam sa ‘lơ̆ng hơdrô̆ kơ bơngai kon kông kơtă hơnih, mă loi ‘noh jĭ bơngai Lào, Ê Đê păng M’Nông, đei tơdrong đei măt lơ tôm hloh tơ̆ xăh  Krông Na”.

Khei 3 pơyan pơkao, pơyan sut, kơdrot chă năm trip đak pơkao, kŭm jing pơyan lêh păng tơbăt năr rơngei, kơna tơmang lăng Đắk Lắk sa roi chơt hơiă. Hăm jơnei hloh kơ bơ̆n hơmĕng, Lêh cheh phe Buôn Ma Thuột ‘măng mă 9 păng dôm tơdrong jang tơbăt 50 sơnăm tơblăh Jơnei Buôn Ma Thuột, rơngei dêh char Đắk Lắk, hlôi tơgop gĭt kăl, tơgŭm Đắk Lắk sơng đei 700.000 ‘nu tơmoi tơmang lăng lơ̆m Jăl khei mă 1/2025,  iŏk yua đơ̆ng tơmang lăng đei 600 ti hlak jên, tŏk vă jê̆ hloh 2 ‘măng pơting hăm khei ‘nâu sơnăm hơdrol. Kiơ̆ kơ yă Nguyễn Thụy Phương Hiếu, Phŏ kơdră Anih vei lăng găh Joh ayŏ, tơplŏng kơdâu păng tơmang lăng Đắk Lắk, pơtôch âu ăn ƀôh, tơmang lăng Đắk Lắk tŏk bŏk ƀrư̆ ƀrư̆ iŏk jang đei yua dôm tơmam ‘lơ̆ng kơ tơring.

“Dôm anih mơdro sa tơmang lăng jang hơdai hăm Anih vei lăng găh Joh ayŏ, Tơplŏng kơdâu păng Tơmang lăng lơ̆m tơdrong pơjing dôm hơnih năm truh, lơ̆m rim tơdrong jang đei lơ kơloăi um rup vă pơyua ăn lơ tơmoi. Tơdrong ‘nao sơnăm ‘nâu ‘noh jĭ thim tơdrong jang năm lăng anih gru groa vă roi tơƀôh, pôk pơ ư dôm hơnih gru groa tơ̆ tơring, tơgŭm tơmoi đei dơ̆ng chă lăng vă kơbăt. ‘Ngoăih kơ tơdrong tơklep hơdai dôm tơdrong jang tơmang lăng, tơmoi oei gơh chă hơlen lăng dơ̆ng găh dôm hơnih gru groa tơ̆ Đắk Lắk”.

Pơyan pơkao cheh phe tơlang tơbŭk tơbăk kŭm hăm dôm cham char ‘lơ̆ng rŏ thim tơdrong hơiă vă sơng đei tơmoi tơmang lăng truh hăm Đắk Lắk. ‘Noh kŭm jing tơdrong hiôk vă tơring jing hơnih truh hơiă, tŏk găh tơmang lăng, tơgop pơtrŭt hơtŏk tơiung mŭk drăm păng roi tơƀôh um rup tơring teh ‘lơ̆ng rŏ truh hăm tơmoi lơ̆m păng ‘ngoăih teh đak.