Lơ̆m dôm năr âu, kiơ̆ rim jăl trong tơ̆ xah Đăk Ngọk, apŭng Đăk Hà, dêh char Kon Tum adoi ƀenh kơ pơkao hla kơ ƀrông ƀrang. Lơ̆m khei năr sơng Têt Nguyên đan Ất Tỵ 2025, Đảng ƀô̆ xah Đăk Ngọk hlôi pơgơ̆r keh kong Hop akŏm bơngai tang măt 'măng mă 3, jăl jang 2025-2030.

'Nâu jĭ tơdrong chĭnh trĭ kăp gĭt ưh hơdrô̆ kơ 239 đảng viên mă oei jĭ đon lui, tơdrong hơpơi 'meh đơ̆ng jê̆ 5.000 kon pơlei lơ̆m xah. Ƀok Lê Văn Y, oei tơ̆ thôn Đăk Tin tơroi: “Sơnăm 2013 năr blŭng tơ-iung pơjing xah Đăk Ngọk, kon pơlei ƀơm lơ tơnap tap, trong nơnăm trôk trăp pơrăm truh tơdrong hơrih, tơdrong pơm jang kơ kon pơlei. Lơ̆m 10 sơnăm tơ-iung păng hơtŏk hăm minh jơnŭm pơgơ̆r drơ̆ng minh, tơguăt tơguăl xah Đăk Ngọk hrei âu hlôi hơtŏk pran. Dang ei xah hlôi keh đang 19/19 tơchơ̆t tơring tơrang 'nao păng tơdrong hơrih kon pơlei dang ei chơt hơ-iă hloh”.

Lơ̆m jăl jang âu ki, 12 chi ƀô̆ hăm 239 đảng viên kơ xah Đăk Ngọk hơnơ̆ng jĭ hla kơ yuk hơlau lơ̆m hơtŏk mŭk drăm – tơpôl, hơtŏk tơdrong hơrih kon pơlei. Truh dang ei 4 lơ̆m 7 thôn kơ xah đei sơkơ̆t tơring tơrang 'nao, 2 thôn đei sơkơ̆t tơring tơrang 'nao tơ̆ tơring kon kông. Jơ̆p xah dang ei oei pă 8 unh hnam hin dơnuh. Ƀok A Xen, bơngai Xơ Đăng, oei tơ̆ pơlei Đăk Kđem ăn tơbăt: “Hơdrol ki pơlei adoi tơnap tap dêh, đơ̆ng 2 sơnăm kơ âu noh kon pơlei tơplih hơdrĕch 'long pơtăm, kon yŏng. Kon pơlei mă tơm noh jang ƀa na păng pơtăm kaphê. Gơnơm đei Đảng, jơnŭm pơgơ̆r tơring tơgŭm đơ̆ng 'noh kon pơlei kĕ hơtŏk tơ-iung phĭ tơtŏ dơnŏ 'lơ̆ng”.

Jăl jang âu ki, lơ̆m 26 tơchơ̆t xah Đăk Ngọk keh đang đei lơ tơchơ̆t kăp gĭt đei jơnei hơdah nhen: rim bơngai jang đei yua hloh 70 triu hlj, pơjing xah tơring tơrang 'nao đei hơtŏk; tơdrong hin dơnuh đei tơjur tenh. Ƀok Phan Tiến Dũng, Ƀĭ thư Chi ƀô̆ adoi jang Kơdră Jơnŭm jang măt trâ̆n thôn Đăk Bình tơroi gah tơdrong hlôh vao lơ̆m pơjing tơring tơrang 'nao: “Chi ƀô̆ pơgơ̆r hăm tơchơ̆t rim khei. Tơroi tơbăt ăn kon pơlei pơm kiơ̆ tôm tơchơ̆t tơlĕch. 19 tơchơ̆t hlôi đei jơnei păng nhôn hlôi jing minh tơring tơrang 'nao ah blŭng sơnăm 2024 đei Anih jang vei lăng kon pơlei apŭng sơkơ̆t hơdah. Đơ̆ng minh thôn juăt jang gah choh pơtăm ah blŭng jăl jang 'nao 55 triu hlj hăm 1 'nu jang, truh ah hơtuch jăl jang đei jê̆ 80 triu hlj hăm 1 'nu jang. Hăm tơdrong hơdrin kơ tôm anih jang chĭnh trĭ hơ-'nhăk tơdrong phĭ tơtŏ dơnŏ 'lơ̆ng ăn kon pơlei”.

Tơplih đon tơchĕng lơ̆m pơm jang kơ kon pơlei hlôi pơjing tơdrong hơrih 'nao ăn tơring Đăk Ngọk. Xah hlôi pơjing đei 6 jơnŭm jang hadoi păng 2 hơp tak xah. Tơdrong hơtŏk mŭk drăm hơtŭm hlôi tơgop hơtŏk tơdrong pơm jang, đei kơjă hloh 450 ha ƀa, hloh 1.600 ha kaphê atŭm hăm kơhrĕng ha 'long xa plei păng 'long pơm pơgang. Hăm pơkăp khŏm mă hơtŏk mŭk drăm tơpôl kơjăp sơđơ̆ng, Hop akŏm bơngai tang măt ăn Đảng ƀô̆ xah Đăk Ngọk jăl jang 2025-2030 sơkơ̆t hơdah, pơjing xah đei jơnei tơring tơrang 'nao, rim bơngai jang đei yua hloh 78 triu hlj 1 sơnăm... Yă Y Sương, Phŏ Ƀĭ thư Đảng uy, Kơdră Anih jang vei lăng kon pơlei xah Đăk Ngọk ăn tơbăt: “Đảng ƀô̆ pơgơ̆r rim anih jang, jơnŭm tơpôl hăm dôm tơdrong pơkăp jang hơdah vă pơm jang kiơ̆ rim sơnăm păng rim jăl jang. Hơvơn tơdrong vang jang đơ̆ng tôm kon pơlei lơ̆m tơring vă pơjing tơring tơrang 'nao. Atŭm hăm noh hơtŏk tơdrong yuk hơlâu đơ̆ng đe kơdră kơpal păng sơnong jang kơ bơngai tơgŭm pơm kiơ̆ dôm tơdrong tơlĕch jang. Akŏm lơ̆m dôm sơnong jang, trong jang vă hơtŏk mŭk drăm – tơpôl, vei sơđơ̆ng tơpôl păng pơjing anih jang chĭnh trĭ lơ̆m tơring. Tơrĕk truh tơdrong pơyua ăn tơpôl, gah kon pơlei kon kông păng dôm tơdrong khop mă hơtŏ hơnơ̆ng sơđơ̆ng 'lơ̆ng”.           

Tơdrong tơplih pran kơtang kơ xah Đăk Ngọk, apŭng Đăk Hà, dêh char Kon Tum lơ̆m dôm sơnăm kơ âu jĭ tơdrong bơ̆ng pang hơdah hloh gah tơdrong pơgơ̆r trŏ ƀlep đơ̆ng anih jang Đảng păng đon bơnôh kon pơlei tơguăt tơguăl. Pơm trong ăn tơdrong jơnei, Đăk Ngọk lui ngeh sơng sơnăm 'nao 2025 kơjăp sơđơ̆ng kiơ̆ tơchơ̆t tơlĕch pơjing tơring pơlei pơla pơdrŏng 'lơ̆ng jơnap.