Lơ̆m dôm năr khei 3 âu, lơ lăm hŏk trư̆k tuyê̆n păng hŏk kơtă tơ̆ yăn âu găh AI, tơplih hăm kơmăy sô̆ tŏk bŏk đei pơgơ̆r  ăn đĭ đăng druh dăm lơ̆m teh đak, lơ̆m noh đei hloi druh dăm jo jăn. Dôm bơngai juăt jang găh AI, bơngai pơchĕh tơdrong tơroi hăm kơmăy sô̆ đei ư hơnhang vang tơroi lơ tơdrong kăl hlŏh, đei yoa hlŏh păng ƀônh pơm kiơ̆ hloh lơ̆m tơdrong jang rim năr kơ bơngai jo jăn.

Mă đơ̆ng jơ̆ng jo, athei yơ yak hăm gre drŏl ră mă lei ‘nhŏng Đoàn Ngọc Chiến, pơlei tơ̆ Hà Tĩnh, ưh đei hŭt jơ pơtâp pơhrăm yơ đơ̆ng bơngai juăt jang pơtho tơƀôh. Tơnglĕng răp mơ̆ng păng chih răk tôm nơ̆r pơtho vă pơyoa ăn tơdrong jang lơ̆m rim ‘măng truh hŏk tơ̆ lăm Pơtho kơmăy sô̆ yoa Khul druh dăm jo jăn Việt Nam pơgơ̆r, ‘nhŏng Chiến tơroi: “Tơdrong jang tơm đơ̆ng inh ‘nŏh tĕch mơdro tơ̆ anih Petshop. Inh ƀôh tĕch mơdro hăm kơmăy sô̆ hrei ‘nâu tŏk tôch pran, mă loi lơ̆m tiktok, đon hơpơi đơ̆ng inh ‘nŏh gơ̆h tơmât yoa kơmăy AI vă chih tơroi lơ tơdrong, pơjing lơ trong tĕch mơdro, video viral… Mưh băt Khul druh dăm jo jăn Việt Nam pơgơ̆r lăm pơtho kơmăy sô̆ ăn bơngai jo jăn, inh chih măt hloi, bơngai jo jăn đei tơgŭm hŏk, vă iŏk yoa kơmăy AI, vă chă tơdrong jang mă lăp păng tơgŭm ăn kơdih kâu. Inh ‘mĕh đơ̆ng rŏng kơnh mưh hŏk đang inh gơ̆h pơm kơdih lơ tơdrong, video viral mă ưh kăl gơnơm kơ bu tơgŭm ăn.)

Hơdai hăm tơdrong tĕch mơdro tơmam pơyoa ăn bơngai ‘mĕh rong kon tơrong tơ̆ Hà Nội, ‘nhŏng Đoàn Ngọc Chiến oei chă roi tơbăt tơ̆ Anih pơtho tơdrong jang păng atŏk tơiung đon rơgei ăn khul bơngai jo jăn Việt Nam hai. Yoa thoi noh, mưh truh hăm lăm hŏk, ‘nhŏng Chiến đei dôm bơngai juăt jang roi tơƀôh găh lơ trong iŏk yoa AI nhen Copilot hăm dôm tơdrong ‘lơ̆ng păng trong tơgŭm ăn tơdrong jang rim năr: găh tơblang kơsô̆ chih răk, chih pơchĕh tơdrong tơroi; trong hŏk pơhrăm păng jang kiơ̆ vă chih hla ar hrĕnh, chih tơlĕch đon tơchĕng…

“Tơdrong jang ‘nŏh chih hơtŏk ƀai tơroi tơbăt tơ̆ anih jang, chih tơlĕch lơ tơdrong jang vă krao hơvơn đe tơgŭm; pơjing trong jang tŏk ăn anih jang… kơna mưh truh hăm lăm hŏk păng đei dôm bơngai juăt jang AI roi tơƀôh tơgŭm, inh hŏk iŏk lơ ƀiơ̆ hăm kơmăy sô̆ vă chă hơlen năng păng lăng năng đon hlôh vao đơ̆ng kơdih kâu vă jang kiơ̆ nhen copilot, inh gơ̆h jang kiơ̆ mưh chih tơlĕch dôm trong jang, chih tơroi tơbăt tơmam, dôm đon tơchĕng vă atŏk tơiung tơdrong jang”.

Kiơ̆ dôm bơngai juăt jang, lơ̆m 2,3 sơnăm truh, đei 65% tơdrong jang dang ei gô đei tơplih hăm kơmăy kơmŏk. ‘Nâu kŭm jing tơdrong ‘lơ̆ng ăn jơhnơr druh dăm jo jăn Việt Nam truh hăm tơdrong pơtho pơhrăm kơmăy sô̆, chă trong jang xa, iung jang xa, tech mơdro Online, vang bơ̆ jang lơ̆m tơpôl. Tơ̆ hơnăp tơdrong ‘nâu, Khul druh dăm jo jăn Việt Nam pơjing trong “Pơtho kơmăy sô̆” akŏm đei lơ bơngai juăt jang rơgei găh lơ tơdrong pha ra băl nhen: AI, Blockchain, Vei sơđơ̆ng păng klĕp ‘lơ̆ng tơdrong tơroi tơbăt, Bơngai chih pơchĕh hăm kơmăy sô̆ rơgei, Bơngai pơma tơblang, Čhơ̆ tơƀôh tơmam, pơm Lập trình… vang truh pơtho dôm tơdrong kăl hlŏh, kơmăy iŏk yoa ƀônh hlŏh lơ̆m tơdrong jang păng tơdrong arih xa ăn druh dăm jo jăn.

‘Nhŏng Phạm Văn Thành, Kơdră vei lăng Khul druh dăm jo jăn Việt Nam ăn tơbăt: “Nhôn pơih lơ lăm hŏk kơtă tơ̆ yăn âu păng hŏk trư̆k tuyê̆n lơ̆m 3 khei truh. Năr ‘nâu jơ hŏk mă blŭng roi tơbăt găh copilot đơ̆ng Microsoft. Găh noh dơ̆ng, nhôn jang hơdoi hăm dôm anih iŏk yoa kơmăy kơmŏk ‘nao boăl gơ̆h pơih hŏk tơ̆ noh kiơ̆ trong iŏk yoa AI… găh tơdrong tang găn hơlĕnh pơdăr hơnơ̆ng chih tơroi găh trong vei lăng sơđơ̆ng, klĕp ‘lơ̆ng dôm tơdrong tơroi kŭm nhen hăm dôm lăm pơtho kơtă tơ̆ yăn âu gô tơgŭm ăn tơdrong pơtho pơhrăm kơmăy sô̆ ăn đe druh dăm jo jăn Việt Nam đei yoa hlŏh dơ̆ng.”

Apinh truh tơgŭm lơ̆m tơdrong "Pơtho kơmăy sô̆", rim bơngai pơtho pơhrăm 1 tơdrong, roi tơƀôh găh AI, tơgŭm ăn bơngai jo jăn hơđơ̆ng jơhngâm mât hơdai hăm tơpôl păng gơh iung jang xa đơ̆ng kơdih. Đơ̆ng noh, đe sư gơ̆h tơgŭm ăn dôm bơngai tam mă băt tơplih hăm kơmăy sô̆ găh dôm tơdrong jang ‘nao.

‘Nhŏng Lê Công Thành, bơngai pơchĕh tơdrong “Pơtho hŏk AI” tơroi: “Rim bơngai jang lơ̆m tơpôl kăl yoa kơmăy kơmŏk rơgei ngăl, tơ̆ lơ teh đak pha ra băl: đe yoa lơ̆m tơdrong jang dăh mă hŏk pơhrăm, yoa lơ̆m tơdrong arih xa rim năr. Pơtih gia 1 tơmam xa bơ̆n gơ̆h băt kơchơ̆t bek ‘lơ̆ng dang yơ. Yoa thoi noh trong iŏk yoa kơmăy rơgei ‘nŏh tôch gĭt kăl. Mă lei sư tôch ‘nao, tam mă đei lơ bơngai iŏk yoa sư. Tơdrong jang inh găh kơmăy rơgei. Inh hơmĕng gơ̆h roi tơƀôh dôm tơdrong kăl đơ̆ng kơmăy rơgei ưh lăp ăn bơngai jo jăn tơ̆ Việt Nam đĕch mă chă roi tơƀôh ăn dôm bơngai tam mă băt găh kơmăy sô̆ hai.

Tơplih hăm kơmăy sô̆ oei hơnơ̆ng lang xă truh rim tơdrong jang, pơih đei lơ tơdrong ‘lơ̆ng vă bơngai jo jăn kơchăng ƀiơ̆ lơ̆m tơdrong jang kiơ̆ păng mât hơdai hăm tơdrong arih xa, pơm hơtŏ băl lơ̆m tơpôl. Dôm lăm “Pơtho kơmăy sô̆” rim năr, rim jơ oei hơnhăk tơdrong rơgei đơ̆ng kơmăy kơmŏk ăn đe druh dăm jơ jăn pơma hơdrô̆ kŭm nhen đĭ đăng kon pơlei pơma atŭm, tơgŭm ăn Việt Nam pơjing 1 tơpôl yoa kơmăy sô̆, kơchăng mât hơdoi păng jang tŏk./.