‘Năr 21/2, tơ̆ plt Hồ Chí Minh pơgơ̆r tơdrong tơbâp tih đơ̆ng Anih tơm Chinh trĭ Đảng Cộng sản Việt Nam păng Khul kơdră chĕp kơ̆l Đảng Kon pơlei Campuchia (CPP) yoa Tổng Bí thư Khul kơdră chĕp kơ̆l Trung ương Đảng Cộng sản Việt Nam Tô Lâm păng Kơdră CPP, Kơdră Thượng viện Campuchia Hun Sen vang pơgơ̆r. ‘Nâu jĭ tơdrong tôch gĭt kăl vă hơtŏk hlŏh dơ̆ng tơdrong pơvei đơ̆ng teh đak jê̆ băl ‘lơ̆ng hơiă, jang hơdoi tôm tơdrong, kơjăp ‘lơ̆ng đơ̆ng 2 Đảng, 2 teh đak păng kon pơlei 2 teh đak Việt Nam - Campuchia lơ̆m chăl ‘nao.

Tơ̆ tơdrong tơƀâp, Tổng Bí thư Tô Lâm păng Kơdră CPP Hun Sen roi tơbăt ăn băl dôm tơdrong tơ̆ rim Đảng, rim teh đak; pơma nuh găh rim tơdrong lơ̆m apŭng plenh teh, tơ̆ tơring păng dôm tơdrong mă 2 păh tơrek truh; tơchĕng ‘lơ̆ng dôm tơdrong iŏk đei mưh jang hơdoi đơ̆ng 2 păh lơ̆m khei ‘năr âu ki păng drơ̆ng nơ̆r hăm dôm trong jang hơdoi tơ̆ hơnăp kơnh. 2 ‘nu kơdră chĕp kơ̆l drŏng nơ̆r hơnơ̆ng bơ̆ jang đei yoa ‘lơ̆ng dôm tơdrong drơ̆ng nơ̆r đơ̆ng 2 Đảng, 2 teh đak, hơtŏk tơdrong jang hơdoi găh khul linh, vei sơđơ̆ng teh đak, hơtŏk tơdrong jang hơdoi mŭk drăm, tĕch mơdro, jŏh ayŏ kơ dŏ xoang, pơtho pơhrăm, chă tơmang lăng mă tơgăl hăm dôm tơdrong ‘lơ̆ng đơ̆ng rim teh đak păng tơdrong pơvei đơ̆ng 2 Đảng, 2 teh đak, atŭm hăm ‘nŏh hơtŏk tơdrong đei yoa đơ̆ng jang hơdoi kơ dôm anih jang ăn Đảng, Quốc hội, dôm anih tơm kơ Khul kơdră teh đak, Mặt trận, khul grŭp kon pơlei păng dôm tơring kơ 2 teh đak, pơjing tơdrong ‘lơ̆ng găh tơdrong pơvei kơ 2 teh đak lơ̆m chăl ‘nao, pơvih đei yoa ‘lơ̆ng ăn kon pơlei 2 teh đak. 

Tơ̆ hop akŏm, Thủ tướng Phạm Minh Chính păng Thủ tướng Hun Manet drơ̆ng nơ̆r hăm 1,2 tơdrong tơm kăl đei tơlĕch jang hrôih tơ̆ hơnăp kơnh, mă loi jĭ tơlĕch jang dôm tơdrong pơchĕh tơguăt tơdrong jang mŭk drăm 2 teh đak Việt Nam - Campuchia kŭm nhen tơdrong jang mŭk drăm kơ 3 teh đak Việt Nam, Campuchia păng Lào.