Tơdrong đei yua âu tơƀôh tơdrong pơyua đơ̆ng kon pơlei tŏk lơ kơlih tơmam choh pơtăm tơm tŏk kơjă. Lơ̆m noh, gah kaphê kơ apŭng đei pơhlom 22.000ha, đei yua hloh 55.000 tâ̆n, đei yua hloh 6.600 tih hlj. Atŭm hăm noh, Đak Mil đei hloh 5.300ha tiu, sâu riêng păng minh ƀar hơdrĕch 'long pơtăm nai đei kơjă măt, sơnăm âu ki đei yua lơ.

Kiơ̆ kơ ƀok Lê Văn Hoàng, Kơdră Anih jang vei lăng kon pơlei apŭng Đak Mil, choh jang xa kiơ̆ trong 'nao hơgei hlôi tơgop kăp gĭt lơ̆m dôm tơdrong đei jơnei tôm tơdrong kơ apŭng ah sơnăm  2024 lơ̆m jơ̆p 12 tơchơ̆t mŭk drăm tơpôl adoi hloh kơ tơdrong pơkăp. Hơtŏk mŭk drăm kơ apŭng sơnăm âu ki đei 9,19%, tŏk hloh 2 'măng kơ hơtŏk mŭk drăm dêh char Đak Nông.