Tơ̆ ŭnh hnam Đại tướng Võ Nguyên Giáp, hnam kơsô̆ 30 Hoàng Diệu, Hà Nội, Tổng Bí thư Tô Lâm hlôi soh hlôt nhang, glơng gơvang pơkao, kuh ka hla bat ƀlŏk hơdơ̆r ‘mêm kơ eng tôch bach hăm Đại tướng Võ Nguyên Giáp, Yŏng khul Ƀô̆ đô̆i kon pơlei Việt Nam. Hloh 30 sơnăm hăm kơchư̆k jang Yŏng Khul ƀô̆ đô̆i, Bí thư Quân ủy Trung ương, chăl sơnăm Đại tướng Võ Nguyên Giáp tơklep kơjăp hăm jơnei tih tên kơ ƀar ‘măng iung tơblăh tang găn Phalăng păng ayăt Mi, hăm tơdrong jang tơ iung pơjing păng vei lăng Teh đak. Đảng, Teh đak hăm kon pơlei bơ̆n hôn bơnê kơtang tơdrong tơgop đơ̆ng Đại tướng Võ Nguyên Giáp. Rim jơhnơr kang ƀô̆, ƀô̆ đô̆i Khul ƀô̆ đô̆i bơ̆n ư̆ ăn hơnăn Đại tướng ‘noh ‘Nhŏng Kơdră kơ Khul Ƀô̆ đô̆i kon pơlei Việt Nam. Tơ̆ hnam ƀlŏk hơdơ̆r kơ Đại tướng Văn Tiến Dũng, Tổng Bí thư Tô Lâm hlôi soh hlôt nhang, tơbăt jơhngơ̆m đon ‘mêm tôch bach hmach tôch kơ dêh, hôn bơnê kơtang ăn Đại tướng Văn Tiến Dũng, Kơdră so chĕp pơgơ̆r Hơnih tơm Ƀô̆ đô̆i vei lăng sơlam teh đak, bơngai hlôi tơgop gĭt kăl lơ̆m tơdrong jang iung tơblăh pơm rơngei hơdrĕch hơdrung, tơ iung pơjing păng vei lăng Teh đak Việt Nam xã hội chủ nghĩa.