Kiơ̆ tơbăt, dôm sơnăm ou ki, dêh char Gia Lai hlôi tơgĕch iung jang dôm tơdrong đei, rơvơn, iŏk đei jơnei hơ iă, tôm tong, vei kơjăp hơnih dơ̆ng gĭt kăl găh chinh trĭ, vei lăng sơđơ̆ng teh đak, sơđơ̆ng tơring; tơdrong jang mŭk drăm tơplih kơtang, trŏ ƀlep, tŏk đei iok jơnei jô̆ hơtŏ đei 6,21%/sơnăm, tơdrong jang mŭk drăm tok vă jê̆ 2 ‘măng pơtêng hăm jăl blŭng. Lăp đơ̆ng rŏng tơƀôh hơdăh dôm tơdrong đei ‘lơ̆ng hơ iă kơ tơring, Tổng Bí thư Tô Lâm tơƀôh hơdăh trong bơ̆ jang kơ Đảng, Teh đak găh kăl atŏk kơtang păng atŏk tơ iung tơlĕch ăn Gia Lai ‘noh tôch kơ lơ. Tổng Bí thư athei Gia Lai dăr lăng hơlen dôm trong tơlĕch ăn, tơdrong jang hơdăh, hơmet pơ ‘lơ̆ng tơhlăk tơhlĭn, hơdrin jang keh đang rim trong tơlĕch jang, tơdrong jang mă Tơdrong tơchơ̆t Đảng ƀô̆ dêh char ‘măng mă XVI hlôi tơlĕch ăn. Akŏm chĕp pơgơ̆r, hơmet ăn ‘lơ̆ng dôm tơdrong pơgơ̆r jơnei hop akom tih đảng ƀô̆ rim hơnih păng Hop akom tih dêh char Đảng ƀô̆ ‘măng mă XVII. Jơ ‘năr ou, Tổng Bí thư Tô Lâm hlôi pôk ăn hơnih ming man hnam pơgang tơring ăn tơring G’lar, apŭng Đak Đoa kơjă kơjên 5 ti hlak jên.