Tổng Bí thư Tô Lâm hôn bơnê kơ Lữ đoàn tên lửa 490 khei năr ou ki hơnơ̆ng jang ‘lơ̆ng bơ̆ jang pơtho pơhrăm chinh trĭ, jơhngơ̆m đon, tơ iung pơjing jơhngơ̆m đon tơgoăt tơgoăl, drơ̆ng mĭnh nơ̆r kơtang, hơtŏk jơhngơ̆m đon hlôh vao găh tơdrong jang, hơnăp jang păng kơrŭn đĭ ai ăn kang ƀô̆, ƀô̆ đô̆i kơ Lữ đoàn. Vă jang keh đang ‘lơ̆ng tơdrong jang đei pơjao lơ̆m chăl ‘nao, Tổng Bí thư athei, Lữ đoàn kăl hơnơ̆ng tơlĕch jang kiơ̆ kơtang Tơdrong tơchơ̆t Hop akŏm tih kơ Đảng lơ̆m teh đak ‘măng mă XIII, Tơdrong tơchơ̆t Hop akŏm tih kơ Đảng Khul Ƀô̆ đô̆i ‘măng mă XI, rim tơdrong tơchơ̆t, nơ̆r athei jang kiơ̆ đơ̆ng Khul Kơdră chĕp pơgơ̆r Trung ương, Hơnih tơm Chinh trĭ, Quân ủy Trung ương, Hơnih tơm Ƀô̆ đô̆i vei lăng sơlam teh đak vă tơlĕch jang kiơ̆ jơnei lơ̆m Binh chủng Pháo binh păng Lữ đoàn 490. Jơ ‘năr ou, Tổng Bí thư jei athei, kăl hơnơ̆ng vei lăng năng tông tơ iung pơjing Đảng bộ Lữ đoàn jang keh đang ‘lơ̆ng hloh, jang kiơ̆ ‘lơ̆ng tơdrong hŏk pơhrăm păng jang kiơ̆ jơhngơ̆m đon ‘lơ̆ng, trong bơ̆ jang hơgei kơ Ƀok Hô, ‘Măng hơvơn tơlech jang kiơ̆ tơdrong joăt joe, plang ăn jơhngơ̆m đon hơgei, tơgăl hơnăn “Ƀô̆ đô̆i Ƀok Hô” lơ̆m chăl hle.