Kiơ̆ tơroi tơbăt, sơnăm 2024, akŏm tơmam GRDP kơ dêh char Nam Định tŏk dang 10% (dơ̆ng mă 9 pơting hăm lơ̆m teh đak). Thu mong jên jang teh đak đei 14.828 ti hlak jên, tŏk 42% pơting hăm sơnăm 2023. Pơma tơ̆ jơ bơ̆jang, Tổng Bí thư Tô Lâm athei, dêh char Nam Định kăl kơ hơnơ̆ng pơgơ̆r bơ̆jang kiơ̆ đei yua dôm tơdrong tơchơ̆t đơ̆ng Trung ương.

Mă hơdăh ‘noh jĭ tơlĕch jang kơtang Tơdrong tơchơ̆t 35 đơ̆ng Anih tơm Chĭnh trĭ găh Hop akŏm Đảng rim tơring yak truh Hop akŏm Đảng lơ̆m teh đak ‘măng mă 14, ‘nâu jĭ hơnăp jang tôch kơ gĭt kăl lơ̆m sơnăm ‘nâu. Hơnơ̆ng jang kiơ̆ Tơdrong tơchơ̆t 18 đơ̆ng Trung ương găh proh hơmet tŏ sĕt bơngai jang chĭnh trĭ bơ̆jang hơgei, đei yua, hơdrin lơ̆m khei 2 đang vă pơgơ̆r Hop akŏm; tơdrong jang ‘noh ƀônh hơ iơch mă lei athei pơvih pơvăn đei yua ăn rim răih kon pơlei. Ƀlep ƀơ̆t hơmet ăn sơng Tết Nguyên đán Ất Tỵ 2025, Tổng Bí thư hmach thơ thâu kơ Đảng bộ, khul kơdră păng kon pơlei dêh char Nam Định hơnơ̆ng hơtŏk pran kơtang tơdrong joăt joe kach mang bơ̆jang kiơ̆ jơnei dôm tơdrong hơgăt, hơnăp jang hlôi tơlĕch ăn.