Tổng Bí thư pôk pơ ư dôm tơdrong iŏk đei tôch ‘lơ̆ng đơ̆ng rŏng kơ hop akŏm mă mônh, mă loi ‘nŏh tơdrong Tơchơ̆t 193 hăm 12 trong jang pơlong năng vă bơ̆ jang kiơ̆ tơdrong tơchơ̆t 57 đơ̆ng Anih tơm Chinh trĭ. Tổng bí thư pơma hơdăh, tơplih hăm kơmăy sô̆ lơ̆m dôm anih jang kơ Đảng hlôi tŏk pran ‘lơ̆ng, hơnhăk ba lơ tơdrong đei yoa ăn kon pơlei păng anih tĕch mơdro, pơjing tơdrong gĭt kăl vă man anih ‘măn răk kơsô̆ kơ teh đak. Mă lei, Tổng Bí thư oei pơma tơƀôh lơ tơdrong athei hơmet mă ‘lơ̆ng; atŭm hăm ‘nŏh athei sek tơlang ‘lơ̆ng dôm tơdrong pơmat tat găh trong pơgơ̆r, tơdrong tơgŭm vă đei tôm jên tơmam gơ̆h bơ̆ jang đei yoa ‘lơ̆ng.

Tổng Bí thư athei hơmet to sĕt hlŏh ‘nŏh 3% jên mong kơ teh đak sơnăm 2025 ăn tơdrong atŏk tơiung khgoa hŏk kơmăy kơmŏk, hơtŏk truh 2% GDP lơ̆m 5 sơnăm đơ̆ng rŏng dơ̆ng. Dôm anih tơm, anih jangkơpal, tơring tơrang akŏm jơhngâm pơjing anih jang kơmăy sô̆, mă loi jĭ anih ‘măn răk kơ teh đak găh anih tĕch mơdro, găh teh; athei chă rơih hơnhăk tech dôm tơmam jang đei, dôm trong jang hăm khoa hŏk kơmăy kơmŏk, tơplih ‘nao rơgei, tơplih hăm kơmăy sô̆ vă jăh tơmât yoa tơ̆ yăn âu.