Lơ̆m jơ ‘năr chơt hơ iă ‘nă hal ƀar hơdrĕch hơdrung tŏk bŏk hơmet ăn sơng Têt joăt joe Ất Tỵ 2025, Tổng Bí thư Tô Lâm sơkơ̆t hơdăh, Việt Nam lăng tơdrong atok tơ iung tơgoăt tơgoăl hăm Trung Quốc jĭ trong tơlĕch jang blŭng hloh lơ̆m trong bơ̆ jang tơbôl pơm tơm kơdih, lơ pang jang ‘lơ̆ng hơ iă. Tổng Bí thư, Kơdră chĕp pơgơ̆r Teh đak Tập Cận Bình sơkơ̆t hơdăh, Đảng, Teh đak Trung Quốc tơlĕch jang hơdrol atŏk tơ iung tơgoăt tơgoăl hăm Việt Nam lơ̆m trong jang tơbôl teh đak tơjê̆. Ƀlep lơ̆m jơ ‘năr ou, Ƀar ‘nu kơdră chĕp pơgơ̆r hlôi vang tơlĕch nơ̆r tơchơ̆t tơlĕch jang Sơnăm tơƀơ̆p dih băl ‘lơ̆ng rŏ Việt Nam-Trung Quốc 2025; drơ̆ng mĭnh nơ̆r iung jang hơdoi ‘lơ̆ng hơ iă rim tơdrong pơgơ̆r tơbăt 75 sơnăm pơjing tơbôl păng Sơnăm tơƀơ̆p dih băl ‘lơ̆ng hơ iă Việt Nam - Trung Quốc 2025; atŏk kơtang pơrô̆ pơrôp, pơtho tơbăt lơ̆m rim răih kon pơlei, mă kăl ‘noh jơhnơr mơlôh ƀar teh đak găh tơgoăt tơgoăl joăt joe ‘lơ̆ng rŏ Việt-Trung Quốc. Tổng Bí thư Tô Lâm athei ƀar pah pơrô̆ athei rim hơnih bơ̆ jang kơrŭn hloh dơ̆ng tơchă trong iung jang jơnei vă vei lăng păng sek tơlang ‘lơ̆ng dôm tơdrong tim mă lăp dih băl, atŏk kơtang jang hơdoi trŏ lăp hăm tơdrong pơkăp tơgoăt tơgoăl ƀar păh ‘moi kiơ̆ Tơdrong tơchơ̆t Liên hợp quốc păng Khôi luơ̆t apŭng plĕnh teh lơ̆m ou đei Tơdrong tơchơ̆t Liên hợp quốc găh Khôi luơ̆t Đak dơsĭ sơnăm 1982.