Bí thư mă mônh, Kơdră teh đak Cuba tơchĕng ‘lơ̆ng dôm tơdrong jơnei mă teh đak Việt Nam, hăm tơdrong chĕp kơ̆l pơgơ̆r đơ̆ng Đảng Cộng sản Việt Nam iŏk đei lơ̆m tơdrong pơjing păng atŏk tơiung teh đak, năng ‘nŏh jĭ tơdrong ‘lơ̆ng ăn kăch mang, cộng sản apŭng plenh teh; atŭm hăm ‘nŏh tơƀôh đon bơnê jơhngâm đon ‘lơ̆ng, hơnơ̆ng tơgŭm tôch ai đơ̆ng Việt Nam ăn Cuba lơ̆m dôm sơnăm âu ki. Tổng Bí thư Tô Lâm pơma hơdăh trong jang đơ̆ng Việt Nam tơgŭm ăn dôm tơdrong tơchơ̆t đơ̆ng Liên hợp quốc lơ̆m tơdrong athei hŭt pơđĭ tơdrong pơvang găn hăm Cuba.

Năm truh ‘măng tơbăt 65 sơnăm pơjing tơdrong pơvei jang tơbôl Việt Nam - Cuba (02/12/1960 - 02/12/2025), Kơdră chĕp kơ̆l 2 Đảng, 2 teh đak roi tơbăt ăn băl rim tơdrong tơ̆ 2 Đảng, 2 teh đak; pơma hơdăh tơdrong gĭt kăl đơ̆ng tơdrong pơvei ‘lơ̆ng hơiă Việt Nam păng Cuba, năng ‘nŏh jĭ tơmam tôch kăp gĭt mă 2 păh athei adrin hơmet kơjăp păng tưk tơiung. 2 păh drơ̆ng nơ̆r tơlĕch lơ tơdrong jang hơdoi vă pơm hơtŏk đon lui găh chinh trĭ; tơlĕch jang đei yoa dôm tơdrong drơ̆ng nơ̆r tih iŏk đei lơ̆m ‘măng năm ngôi đơ̆ng Tổng Bí thư, Kơdră  teh đak Tô Lâm truh tơ̆ Cuba khei 9/2024 ki; adrin pơgơ̆r mă ‘lơ̆ng dôm tơdrong jang vă tơbăt lêh tih, ngôi pơchơt hơdai ăn kon pơlei lơ̆m sơnăm jang tơbôl Việt Nam - Cuba 2025.