Hăm jơhngâm đon chơt hơiă ƀât vă sơng sơnăm ‘nao 2025 păng năm truh ‘măng tơbăt 95 sơnăm pơjing Đảng Cộng sản Việt Nam, ‘năr 29/12, Tổng Bí thư Tô Lâm kŭm hăm Khul jang đơ̆ng Trung ương truh sŏh nhang, plang pơyơ̆r pơkao ƀlŏk hơdơ̆r kơ Ƀok Hô tơ̆ Hnam soi Chung Sơn – Hnam soi hơdrĕch đe Ƀok Hô păng tơ̆ Anih gru grao gĭt kăl Kim Liên, apŭng Nam Đàn, dêh char Nghệ An.

Tổng Bí thư Tô Lâm tơƀôh jơhngâm đon ‘mêm bơnê tôch ai păng lui yom tôch pơnĕh hăm Ƀok Hô, kơdră chĕp kơ̆l tôch gơ̆h hơgei kơ Đảng păng kon pơlei bơ̆n, bơngai tơblăh iŏk rơngei ăn hơdrĕch hơdrung. Bơngai hlôi plang đĭ chăl arih ăn tơdrong tơblăh iŏk rơngei hơdrĕch hơdrung, tơgar iŏk tơdrong rơngei, hiôk hian ăn hơdrĕch hơdrung Việt Nam păng apŭng plenh teh. Đơ̆ng rŏng kơ ‘nŏh, Tổng Bí thư Tô Lâm năm tơ̆ Hnam soi kơ hơdrĕch Ƀok Hô, sŏh nhang, plang pơkao, ƀlŏk hơdơ̆r, hăm jơhngâm đon ‘mêm kơ eng kơ Ƀok Hô păng kơtum kơtŏng ‘nhŏng oh lơ̆m unh hnam Ƀok.