Ƀlep ƀât Tết nguyên đán Ất tỵ 2025 vă truh păng năm truh ‘măng tơbăt 95 sơnăm năr pơjing Đảng Cộng sản Việt Nam, pơgê 16/1 tơ̆ Nam Định, Tổng Bí thư Tô Lâm chĕp kơ̆l khul jang đơ̆ng Trung ương truh soh plang nhang, pơyơ̆r pơkao ƀlŏk hơdơ̆r kơ Tổng Bí thư Trường Chinh tơ̆ Rup man păng Hnam ƀlŏk hơdơ̆r kơ Tổng Bí thư Trường Chinh.

Tổng Bí thư Trường Chinh hơnăn tơpă ‘nŏh jĭ Đặng Xuân Khu, rơnĕh ‘năr 9/2/1907, lơ̆m 1 unh hnam đei hŏk jrŭ ‘mêm kơ teh đak, đei lơ tớdrong juăt ‘lơ̆ng, gơ̆h hơgei tơ̆ plei Hành Thiện, xăh Xuân Hồng (Xuân Trường). Hlŏh 60 sơnăm bơ̆ jang kăch mang hơnơ̆ng (đơ̆ng sơnăm 1925 -1988), ƀok đei pôk jang lơ kơchư̆k gĭt kăl kơ Đảng păng teh đak…Lơ̆m rim kơchư̆k jang, ƀok Trường Chinh hơnơ̆ng tơƀôh hơdăh jĭ kăn ƀô̆ chĕp kơ̆l gơ̆h hơgei, jang tôch tơnăp, băt ‘mêm kơ bôl boăl, kon pơlei, đĭ jơhngâm arih,iung tơblăh yoa tơdrong rơngei, hiôk hian kơ Teh đak, yoa tơdrong hiôk chơt kơ kon pơlei.

Jĭ bơngai hŏk tro tôch rơgei kơ Ƀok Hô, bơngai chĕp kơ̆l kăch mang tôch gơh, bơngai jang chinh trĭ kơjăp ‘lơ̆ng, Tổng Bí thư Trường Chinh ‘măn ăn Đảng păng Teh đak lơ tơmam kăp gĭt găh lý luận chính trị, lơ̆m noh đei bản & quot; Tơdrong jang găh Joh ayŏ kơ dŏ xoang Việt Nam" truh dang ei dôm đon tơchĕng găh joh ayŏ kơ dŏ xoang đơ̆ng ƀok oei tôch kăp gĭt đĕch, jĭ dôm ƀai hŏk tôch gĭt kăl ăn Đảng bơ̆n lơ̆m tơdrong tơiung pơjing păng vei lăng Teh đak Việt Nam xã hội chủ nghĩa.