Tổng Bí thư Tô Lâm hơiă hăm dôm tơdrong jơnei tih tên, tôm tơdrong đơ̆ng Trung Quốc iok đei đơ̆ng rŏng Hop akŏm mă XX truh dang ei; pơma hơdăh Việt Nam hơnơ̆ng năng kăl tơdrong pơm hơtŏk tơdrong pơvei hăm Trung Quốc ‘nŏh jĭ tơdrong tôch kăp gĭt, jĭ trong jang tơm đei rơih hơdrol lơ̆m tơdrong jang tơbôl đơ̆ng kơdih, kiơ̆ trong jang lơ pang đơ̆ng Việt Nam.

Pơma hơdăh Quảng Tây jĭ tơring tơklep kơjăp hăm Việt Nam, Tổng Bí thư tơchĕng ‘lơ̆ng hơnăp jang, anih dơ̆ng đơ̆ng Quảng Tây lơ̆m tơdrong pơm hơtŏk tơdrong pơvei jang tơbôl, jang hơdoi đei yoa ‘lơ̆ng hăm Việt Nam. Găh tơdrong jang hơdoi tơ̆ hơnăp kơnh, Tổng Bí thư athei Quảng Tây păng dôm tơring Việt Nam ‘moi kiơ̆ đon hlôh vao atŭm đơ̆ng kơdră chĕp kơ̆l, hơtŏk tơdrong pơvei, jang tơbôl, hlôh vao băl; tơlĕch jang đei yoa tơdrong jang hơdoi 2 păh kŭm đei yoa ngăl lơ̆m rim tơdrong, mă loi găh mŭk drăm – tĕch mơdro, anih jang, trong nơnăm, khoa hŏk kơmăy kơmok, tơplih ‘nao rơgei, kơmăy AI…