Tơ̆ jơ sơng, Ƀok Tổng Bí thư ră hơdah, 'măng năm tơmang ou 'noh vă hơtŏk tơdrong jang tơbôl tôm tơdrong, mă kăl noh jang hadoi gah mŭk drăm hăm Indonesia. Việt Nam pơtrŭt dôm anih jang mŭk drăm Indonesia asong jang tơ̆ Việt Nam păng hơpơi 'meh Indonesia pơm trong hiôk ăn dôm anih jang mŭk drăm Việt Nam pơih să asong jang tơ̆ Indonesia. Sơkơ̆t hơdah tơdrong tơgŭm hăm dôm tơdrong jang mă Anih jang Ciputra tŏk bŏk oei pơm jang tơ̆ Việt Nam, Ƀok Tổng Bí thư  pơtruh nơ̆r hăm Anih jang mŭk drăm jang hadoi kơjăp hăm Anih jang vei lăng kon pơlei pơlei tơm Hà Nội păng dôm anih jang đei tơrĕk vă tơlĕch pơm jang; atŭm hăm noh pơtrŭt anih jang mŭk drăm pơtoi hơlen tơlĕch dôm tơdrong jang 'nao tơ̆ Việt Nam, iŏk yua tơnăp hloh dơ̆ng dôm tơdrong jang pran lơ̆m tơdrong asong jang, tơgop vă Việt Nam đei jơnei dôm tơchơ̆t hơtŏk kiơ̆ tơchơ̆t tơlĕch.  

Adoi lơ̆m kơsơ̆ 'năr brei, Ƀok Tổng Bí thư Tô Lâm hlôi truh akŏm Lêh tơbang trong gre păr tơpăt đơ̆ng anih jang Vietnam Airlines đơ̆ng pơlei tơm Hồ Chí Minh păng Denpasar, tơring tơm kơ Bali đơ̆ng khei 6 sơnăm ou, jing trong păr mă 2 kơ Vietnam Airlines tơroh Việt Nam - Indonesia, hơtŏk kơsô̆ 'măng păr kơ Anih jang gah gre păr kơ 2 teh đak tŏk 14 'măng păr rim giĕng.