Tổng Bí thư Tô Lâm sơkơ̆t hơdăh Việt nam lăng kơjăp Singapore ưh khan lăp atŭm lơ̆m pơbŭng hnam ASEAN, mă oei mĭnh teh đak jang hơdoi kăl, yak hơdoi lơ̆m tơdrong atŏk tơ iung păng vang mơ̆t apŭng plĕnh teh kơ Việt Nam. Hôn bơnê kơtang dôm tơdrong kăl mă ƀar păh hlôi iŏk đei lơ̆m rim ‘măng pơma dơnuh hăm rim kơdră Singapore lơ̆m ‘măng iung năm tơmang teh đak Singapore adoi nhen tơdrong ƀar păh hơnơ̆ng kĭ pơkăp dơ̆ng lơ tơdrong drơ̆ng mĭnh nơ̆r jang hơdoi ‘nao lăp ƀar giĕng đơ̆ng ‘măng năm tơmang, Tổng Bí thư athei ƀar păh hrôih hơnơ̆ng pơjing ‘lơ̆ng hơ iă hloh dơ̆ng tơgoăt tơgoăl jang hơdoi Gĭt kăl Tôm tong ƀar teh đak ‘moi kiơ̆ tơdrong kĭ pơkăp Tơdrong Iung jang tơlĕch jang kiơ̆ tơgoăt tơgoăl Jang hơdoi Gĭt kăl tôm tong jăl jang 2025-2030. Ƀar ‘nu kơdră drơ̆ng mĭnh nơ̆r pơm hơtŏk loi dơ̆ng tơgoăt tơgoăl ƀar păh đảng chĕp pơgơ̆r teh đak, vei kơjăp jang hơdoi pơtho pơjing kang ƀô̆ dơnơm, chă tơchĕng pơjing trong jang ăn tơƀơ̆p pơma dơnuh dih băl hơnơ̆ng vă pơm hơtŏk hlôh vao dih băl, tơbăt dih băl trong jang ‘lơ̆ng atŏk tơ iung teh đak, pơjing hơyak kăl tơgoăt tơgoăl dih băl lơ̆m hơnô̆ hơnăp kơnh.