Tơ̆ jơ sơng, Tổng Bí thư Tô Lâm sơkơ̆t hơdah Việt Nam hơnơ̆ng lăng tơgĭt tơdrong jang tơbôl hăm Kyrgyzstan. Ƀok Tổng Bí thư akhan, lơ̆m hloh 30 sơnăm jang tơbôl chinh trĭ - jang tơbôl đei hơmet 'lơ̆ng, jang hadoi mŭk drăm – tĕch pơdro kơ 2 teh đak hlôi đei hơtŏk kăp gĭt, mă lei oei đei lơ tơdrong kăl kơ jang, hơpơi 'meh hơtŏk hloh dơ̆ng tơdrong jang tơbôl 2 pah kiơ̆ dôm tơdrong jang hlôi pơkăp kơ 2 pah, iŏk yua dôm tơdrong pran mă Tơchơ̆t jang tĕch pơdro hiôk hian đơ̆ng Việt Nam păng Jơnŭm jang Mŭk drăm Á – Âu; 2 teh đak gơh iŏk yua sơnong jang tơroh tơring Trung Á păng ASEAN.

Khei năr truh, 2 kơdră drơ̆ng nơ̆r akhan, 2 teh đak đei lơ tơdrong hiôk vă hơtŏk jang tơbôl 2 pah kiơ̆ pơkăp hơtŭm pơyua; ră hơdah kăl hơtŏk pran akŏm pơma dơnuh đe kơdră kơpal, lơ̆m tơdrong jang 2 teh đak păng lơ teh đak, Đảng, Kuôk hô̆i vă hơtŏk tơdrong kăp gĭt gah jang chinh trĭ hơtŏk chih akŏm tơchơ̆t jang hadoi kơ dôm anih jang tơm, rim tơring.