Pơgê 9/1, tơ̆ plt Hồ Chí Minh, ƀlep ƀât tết Nguyên đán Ất Tỵ 2025 vă truh, năm truh 95 sơnăm Năr pơjing Đảng Cộng sản Việt Nam (3/2/1930-3/2/2025) Tổng Bí thư Tô Lâm truh akŏm păng pơgơ̆r jơ tơƀâp đe ƀok Kơdră chĕp kơ̆l Đảng, teh đak adrol sơ̆, đe kăn ƀô̆ kră rơgei, bơngai tang măt ăn khul jang khoa hŏk, khul hơri hơxoang kơ dôm dêh char, plt găh Pơbăh.

Tơ̆ jơ tơƀâp, Tổng Bí thư Tô Lâm pơma hơdăh, tơ̆ dôm hop akom âu ki, Trung ương Đảng drơ̆ng nơ̆r chih hơdăh chăl hle, chăl jang tŏk đơ̆ng hơdrĕch hơdrung bơ̆n, ‘nŏh jĭ chăl jang tŏk pơdrŏng, hơnŭk hơnoa hăm tơdrong chĕp kơ̆l pơgơ̆r đơ̆ng Đảng Cộng sản. Jơnăr pơtơm jô̆ lơ̆m chăl hle ‘nŏh iŏk đơ̆ng Hop akŏm mă XIV kơ Đảng păng vă bơ̆jang dôm trong jang gĭt kăl lơ̆m chăl hle âu, Đảng, Anih tơm Chinh trĭ, Ban Bí thư, Quốc hội, Khul kơdră teh đak hlôi tơlĕch lơ trong jang gĭt kăl.

Tổng Bí thư ăn tơbăt, Đảng, teh đak hơnơ̆ng chih hơdăh tơdrong jang tŏk hrĕnh mă lei athei pran kơjăp ‘moi kiơ̆ khoa hŏk, kơmăy kơmŏk, tơplih hăm kơmăy sô̆ păng kăl hlŏh jĭ iŏk kon bơngai pơm tơm, năng kăl truh tơdrong atŏk tơiung khul bơngai jang rơgei. Hơnơ̆ng pơlung anih tĕch mơdro tơmât jên jang tơchĕng hơlen păng jang tŏk, mă loi hăm kơmăy kơmŏk ‘nao, kơmăy sinh hŏk; pơjing tơdrong ‘lơ̆ng ăn anih tĕch mơdro iung jang xa, tơplih ‘nao rơgei păng pơjing đei kơjă mŭk drăm ‘nao. Tổng Bí thư 1 ‘măng dơ̆ng tơƀôh đon hơpơi ‘mĕh hơnơ̆ng iŏk đei tơdrong tơgŭm, tơgop gĭt kăl đơ̆ng đe kơdră chĕp kơ̆l adrol sơ̆, dôm bơngai đei hŏk jrŭ, bơngai jang khoa hŏk, bơngai joh hơri hơxoang – dôm bơngai hơnơ̆ng tưk tơiung jơhngâm hưch hanh, pơjing jơhngâm pran tih tên ăn tơdrong jang tŏk kơ teh đak.