Pơgê năr 30/12,Tổng Bí thư Tô Lâm vang năm păng pơm tơm jơ tơƀơ̆p muh măt bơngai tang măt khul hŏk jrŭ, bơngai khoa hŏk lơ̆m teh đak. Rim bơngai tang măt tơroi tơbăt dôm tơdrong iŏk đei lơ̆m chă tơchĕng, jang kiơ̆, pơtho pơjing kơ minh ƀar tơdrong jang kăl nhen jang pơgang, choh jang sa, kmăi kmŏk hơgei…; bơ̆ jang hơvơn, akŏm păng iung jang kơtang đơ̆ng khul hŏk jrŭ, bơngai khoa hŏk păng apĭnh athei hăm Đảng păng Teh đak. Iung pơma tơ̆ jơ tơƀơ̆p muh măt, Tổng Bí thư sơkơ̆t hơdăh, khul hŏk jrŭ ‘noh khul tang măt ăn jơhngơ̆m đon gơ̆h hơgei kơ kon pơlei păng hơdrĕch hơdrung, jĭ mĭnh lơ̆m khul gĭt kăl hloh hơnhăk đei hơyak pran păng tơdrong pơdrŏng hơnŭk hơnoa ăn Teh đak. Athei, khul kơdră chĕp pơgơ̆r jang đảng, kơdră chĕp pơgơ̆r tơring kăl tơplih ‘nao kơtang tơdrong pơtho pơjing, rơ̆ih, tơmơ̆t jang hăm bơngai hŏk jrŭ, bơngai khoa hŏk vă hơnơ̆ng tơ iung pơjing păng jang kiơ̆ ‘lơ̆ng hơnăp jang kơ khul hŏk jrŭ trŏ lăp hăm tơdrong pơ koel atŏk tơ iung teh đak tĕnh koăng păng kơjăp. Tổng Bí thư jei athei, khul hŏk jru, bơngai khoa hŏk lơ̆m teh đak hrôih hơdrin truh sơnăm 2030 kăl đei 100 trong tơchăr hơgei, pơm tơlĕch ‘lơ̆ng tơdrong jang khoa hŏk lơm dôm tơdrong jang khoa hŏk apŭng plĕnh teh; tơmam drăm khoa hŏk, kmăi kmŏk, tơdrong tơroi hle, joh ayŏ gĭt kăl ‘lơ̆ng liĕm. Truh sơnăm 2045, khul hŏk jrŭ Việt Nam dơ̆ng hơlou lơ̆m tơring, găh lơ̆m khul blŭng apŭng plĕnh teh.