Pơgê năr 3/2, Hơnih bơ̆ jang Trung ương Đảng hlôi pơgơ̆r tơƀơ̆p muh măt “Chơt hơ iă kơ Đảng-Chơt hơ iă kơ Puih mak, hmach Têt ăn kang ƀô̆, bơngai jang Hơnih bơ̆ jang Trung ương Đảng. Tang măt Hơnih tơm Chinh trĭ, Ban Bí thư, Tổng Bí thư Tô Lâm hôn bơnê kơtang dôm tơdrong jơnei mă kang ƀô̆, bơngai jang Hơnih bơ̆ jang Trung ương Đảng hlôi iŏk đei lơ̆m bơ̆ jang pơchoh trong, tơgŭm ăn bơ̆ jang chĕp pơgơ̆r, pơrô̆ jang đơ̆ng Trung ương Đảng, Hơnih tơm Chinh trĭ, Ban Bí thư. Tổng Bí thư tơbăt, kơtă lơ̆m năr bơ̆ jang blŭng a kơ sơnăm Ất Tỵ, Hơnih bơ̆ jang Trung ương Đảng hơmet ming, hăm sơnong jang ‘nao. Găh tơdrong jang lơ̆m khei năr kơnh, vă trŏ lăp hăm trong chĕp pơgơ̆r, pơrô̆ jang đơ̆ng Đảng păng teh đak, Tổng Bí thư Tô Lâm athei, Hơnih bơ̆ jang Trung ương Đảng hơnơ̆ng jang ‘lơ̆ng hơnăp jang, tơdrong jang kơdih, iung jang kiơ̆ ‘lơ̆ng joăt joe tơgoăt tơgoăl pôm nơ̆r ƀơ̆r đon, hơdrin jang keh đang rim trong tơlĕch jang hăm jơnei kơtang hloh dơ̆ng pơtêng hăm sơnăm 2024, jang keh đang ‘lơ̆ng liĕm tơdrong jang mă Khul kơdră chĕp pơgơ̆r Trung ương Đảng, Hơnih tơm Chinh trĭ, Ban Bí thư lui yom pơjao ăn.