Tổng Bí thư Tô Lâm ăn tơbăt, đunh kơ âu hlŏh 65 sơnăm, ‘năr 28/11/1959, Ƀok Hô chih ƀai "Têt pơtăm ‘long", đăng tơ̆ ƀăo Nhân Dân, krao hơvơn rim bơngai, rinh unh hnam, rim khul grŭp, tơring tơrang vang pơjei băl pơtăm ‘long, vei lăng ‘long păng tơblang hơdăh tơdrong gĭt kăl, tôch đei yoa đơ̆ng pơtăm ‘long, pơjing bri.

Tổng Bí thư pơma hơdăh, truh dang ei rim ‘măng pơyan Puih mak truh, "Têt pơtăm ‘long" tơpă jing năr pơchơt kơ đĭ đăng Đảng, đĭ đăng kon pơlei păng đĭ đăng khul linh bơ̆n. ‘Nâu ưh kơsĭ lăp 1 tơdrong jang tôch gĭt kăl đĕch mă oei tơƀôh hơdăh nơ̆r pơkăp đơ̆ng Việt Nam hăm tơpôl apŭng plenh teh păng tơlĕch trong jang  kơ teh đak găh tang găn tŏ ‘mi kial  tơplih, năm truh 1 plei teh rơgŏh ‘lơ̆ng, yoa tơdrong jang tŏk hrĕnh păng pran kơjăp kơ teh đak. Ƀlep ƀât ‘măng mă âu, Tổng Bí thư athei, dôm Anih tơm, anih jang kơpal, mă loi jĭ Anih tơm vei lăng tơmam drăm păng cham char, Anih tơm vei lăng choh jang xa păng atŏk tơiung tơring tơrang athei jang hơdoi, hơtŏk tơdrong dăr hơlen, pơgơ̆r dôm tơring bơ̆ jang mă đei yoa tơdrong pơtăm ‘long âu.