Tổng Bí thư hôn bơnê kơtang bơ̆ jang hơmet ăn tơnăp, hla bơar tơbăt bơ̆ jang chinh trĭ tơƀôh hơdăh trong jang tơplih ‘nao, tơdrong jang lơ̆m jăl kơnh tôm tong. Ƀok athei tơring hơnơ̆ng vei kơjăp sơđơ̆ng chinh trĭ, sơđơ̆ng dơ̆ng kơjăp tơring, kiơ̆ yok rok jơ̆ng hơnăp jang pơm jŭk yŭk trong hơlou kơ đang viên, pơtrŭt kon pơlei vang iung jang tơ iung pơjing tơpôl sơđơ̆ng, ‘lơ̆ng hơ iă. Tơring kăl atŏk kơtang tơplih ‘nao tơchăr, pơm hơtŏk ‘lơ̆ng tơdrong hơrih sa, vei lăng năng tông jơhngơ̆m jăn, pơtho pơhrăm, tơjur dơnuh kơjăp ‘lơ̆ng, ‘nĕ lê̆ vih hơlơ̆k dơnuh dơ̆ng. Tổng Bí thư jei pơma hơdăh athei hơmet pơ ‘lơ̆ng trong bơ̆ jang, pơm hơtŏk hop akŏm chi ƀô̆ ‘lơ̆ng hơ iă, atŏk tơ iung đang viên ‘nao, trŏ lăp hăm tơdrong ‘meh vă atŏk tơ iung lơ̆m jăl ‘nao.