Hơnih hop akŏm Hơnih Kanh sat Vei lăng bơ̆ jang păng Sơđơ̆ng tơpôl (ksô̆ 50 Lý Tự Trọng, phương Buôn Ma Thuột, dêh char Dak Lăk), kơ hrĕng đag viên găh Đảng ƀô̆ Hơnih vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆, Hơnih thuê̆ dêh char Dak Lăk truh năm pơm hla bơar tơplih kơtheh. Đảng viên Hồ Văn Tĩnh tơroi tơbăt, lơ̆m pơm hla bơar đei pơm tôch tĕnh koăng.“Tơdrong pơm kơtheh ou keh đang lăp dang 3-5 pơnĭt jơ, găh tơdrong gô chang jei lăp 5 – 7 pơnĭt, akŏp đĭ đăng chă pơm lăp tơhoach 10 – 15 pơnĭt. Mă blŭng, khul kŏng pơtho tơƀôh ăn hơnih tơ oei phĭn rup, đơ̆ng rŏng ‘noh bơ̆n lăng hơlen hơnăn bơ̆n lơ̆m hla bơar hô sơ đang viên nhen: khei năr sơnăm rơneh, năr mơ̆t Đảng, pơlei pơla, hơnih oei dang ei ... Tơdăh dôm tơdrong ƀlep ngăl bơih lei pơm keh đang bơih.”

          Tơ̆ hơnih pơm hla bơar Kŏng ang phương Ea Kao, dêh char Dak Lăk, jei đei kơ mơjĭt ‘nu đang viên năm pơm hla bơar. Đảng viên Trần Quang Thống, 65 sơnăm, Chi ƀô̆ Koeng Kơphô̆ 11, phương Ea Kao tơbăt, tơdrong pơm hla bơar tơplih kơtheh tơ̆ ou tôch kơ ƀônh:“Ĭnh mơ̆t Đảng lơ̆m sơnăm 1984, truh dang ei hlôi ƀar ‘măng tơplih kơtheh, jei lơ̆m pơm ƀô̆ đô̆i sơ̆. Dang ei pơm tơplih kơtheh tơklep kơchip kiơ̆ tơdrong tơchơ̆t ‘nao đơ̆ng Khul kơdră chĕp pơgơ̆r Trung ương vă vei lăng năng tông đang viên ‘lơ̆ng hloh păng tơ iung pơjing rim hơnih đang trŏ lăp hloh. Rim đe boăl kŏng ang bơ̆ jang tơplih kơtheh jang tôch tơnăp, phăl hơlăng păng lăp mĭnh ƀar pơnĭt jơ ‘noh pơm đang bơih.”.

     Lăp đơ̆ng rŏng hơgrop, dêh char Dak Lăk đei hloh 137.000 ‘nu đảng viên, găh hloh 5.200 hơnih đang tơring. Jang kiơ̆ Nơ̆r athei jang kiơ̆ kơsô̆ 51 đơ̆ng Ban Bí thư păng trong pơprŏ jang đơ̆ng Hơnih tơm Kŏng ang, Kŏng ang dêh char hlôi pơrô̆ athei Hơnih Kanh sat Vei lăng bơ̆ jang păng Sơđơ̆ng tơpôl atŭm hăm kŏng ang 102 tơring, phương, proh hơmet kmăi kmŏk păng bơngai jang vă bơ̆ jang pơm hla bơar tơplih kơtheh đang viên. Đơ̆ng rŏng mĭnh giĕng tơlĕch jang, hlôi pơm keh đang 70.000 kơtheh, jơnei hloh 50% trong tơlĕch jang. Lơ̆m giĕng ou, bơ̆ jang tơplih kơtheh ou gô bơ̆ jang keh đang, keh đang hrôih trong tơlĕch ăn. Thiếu tá Lê Đình Đô, Kơ iĕng Kơdră Hơnih Kanh sat Vei lăng bơ̆ jang păng Sơđơ̆ng tơpôl, kơ Kŏng ang dêh char, tơbăt:“Hơnih ou iung jang pơchoh trong ăn Khul kơdră chĕp pơgơ̆r Kŏng ang dêh char proh hơmet kmăi kmŏk ăn 102 hơnih kŏng ang tơring, phương lơ̆m dêh char bơ̆ jang pơm hla bơar tơplih kơtheh. ‘Ngoăih kơ ‘noh, tơ̆ păh Hơlĕch dêh char Dak Lăk proh hơmet ăn 2 hơnih tơplih kơtheh ăn khul đang viên tŏk bŏk bơ̆ jang tơ̆ ou; hăm tơring găh Pơmơ̆t dêh char jei proh hơmet ăn 3 hơnih, bơ̆ jang “3 hơyuh, 4 khul”, bơ̆ jang hơnơ̆ng truh năr tơdrou păng năr Tơpơh vă pơm hla bơar tơplih kơtheh ăn đang viên”.