Rim năr, mưh ƀrưch măt ‘năr lĕch, khul linh Kanh sat đak dơsĭ Việt Nam đĭ hơmet đang ‘lơ̆ng rim tơdrong bơih. Đơ̆ng măt năng tơpăt ‘lơ̆ng, rim hơyak hrơ̆ch hrơ hrơ̆ch đơ̆ng đe linh nhen găn đĭ tơdrong tŏ hang lơ̆m pơyan he tơ̆ tơring găh Tu. ‘Năr tŏ hlŏh 40 độ C dăh mă ‘mi pru đunh, đe linh oei hơnơ̆ng adrin pơtâp pơhrăm, pơgê kŭm nhen tơ̆ kơsơ̆, lơ ‘măng athei pơtâp hloi tơ̆ kơmăng.

Thượng úy Nguyễn Hữu Duy Thái tơroi: Vă gơ̆h đei khul yak pơrŏ ‘lơ̆ng, rim bơngai lơ̆m khul athei jing mĭnh, adrin đĭ jơhngâm. Dôm hơyak jơ̆ng, ti hơvât athei lei lăi băl, hrơ̆ch ‘lơ̆ng. Mă đơ̆ng gleh hrat ră mă lei bu bu kŭm adrin khŏm tơƀôh hơdăh bưng ai đơ̆ng linh Kanh sat đak dơsĭ Việt Nam: “Đei hrŭk hơbăn ao linh Kanh sat đak dơsĭ kơdih kâu inh kŭm nhen dôm bơngai nai ƀôh tôch hưch hanh, mưh đei yak pơrŏ tơ̆ cham xă Ba Đình. Khei ‘năr pơtâp pơhrăm đei ƀât ‘năr tŏ, ‘mi tih kơnê̆ mă lei nhôn oei adrin tôch ai vă jang đang ‘lơ̆ng tơdrong jang đei pơjao”.

Dơ̆ng tŏk bŏk khul linh, Trung úy Trần Đức Nhân chơt hơiă pơma: ‘Nâu jĭ tơdrong hưch hanh tih hăm ‘nhŏng. Đei măt lơ̆m khul linh yak pơrŏ kơ năr lêh tih, Nhân năng ‘nŏh jĭ tơdrong tôch hưch hanh, kŭm jing hơnăp jang athei jang kĕh ‘năi. Tơdrong mât 1 ƀơ̆r đon păng adrin hơnơ̆ng tơgŭm ăn đe kăn ƀô̆, linh yak hlŏh gleh hrat, pơmat tat: “Athei hơmet mă ‘lơ̆ng jơhngâm đon kơdih vă gơ̆h yak hlŏh. Kơdih kâu athei adrin tôch ai ‘mơ̆i. Tơdrong hưch hanh đơ̆ng kơdih kâu ‘nŏh vang tơgop 1 păh iĕ ioch lơ̆m tơdrong jang tih kơ teh đak.”

Oei Thượng úy Nguyễn Phúc Đệ, đơ̆ng rŏng kơ sut đak hŭt hang tơ̆ muh măt, tơroi dôm khul linh hlôi jang đang tơdrong pơtâp pơhrăm, dang ei oei hơmet ming mă ‘lơ̆ng dơ̆ng, vă tơmât hơdai hăm rim khul grŭp. Đei pơmat tat, gleh hrat mă lei tôch hơiă mưh đei hrŭk hơbăn ao linh Kanh sat đak dơsĭ, đei tơgop 1 păh ăn năr lêh tih kơ hơdrĕch hơdrung: “Kơdih kâu tôch pŭn păng hơiă mưh đei tơgop ăn tơdrong jơnei kơ năr lêh tih. Inh kŭm hăm bôl boăl lơ̆m khul adrin tôch pơneh vă gơ̆h jang đang ‘lơ̆ng tơdrong jang.”

Đơ̆ng rŏng kơ pơtâp pơhrăm, Trung tướng Lê Quang Đạo – Yŏng Kanh sat đak dơsĭ păng Trung tướng Bùi Quốc Oai – Chính ủy Kanh sat đak dơsĭ – jur tơ̆ sân, truh tơƀâp, pơlung rim khul oei pơtâp pơhrăm. Dôm tơdrong rôp ti, jet gia pơma nuh, tơƀôh đon lui, kŭm hăm dôm tơmam hơpăh nhen tơiung dơ̆ng jơhngâm đon ăn đe kăn ƀô̆ linh. Tang măt ăn Ƀok yŏng Khul linh Kanh sat đak dơsĭ Việt Nam, Trung tướng Bùi Quốc Oai pơtruh nơ̆r: “Iĕm athei vei lăng ‘lơ̆ng jơhngâm pran, adrin pơtâp pơhrăm, hơnhăk lơ̆m jơhngâm kơdih tơdrong hưch hanh, čhôk ‘nă. Lơ̆m năr lêh tih, rim hơyak jơ̆ng đơ̆ng iĕm ưh lăp tơƀôh jơhngâm pran, gơ̆h hơgei đĕch, mă oei jing bưng ai tih, hơyak tŏk pran đơ̆ng Khul linh Kanh sat đak dơsĭ Việt Nam.”

Atŏk tơiung jơhngâm đon Kăch mang Khei 8 păng Quốc khánh 2/9 ưh kĕ tôch, hăm tơdrong juăt tơblăh khŏm đei jơnei đơ̆ng Khul linh kon pơlei Việt Nam, tơdrong adrin mât 1 ƀơ̆r đon, adrin ưh đei pơdơ̆h đơ̆ng kăn ƀô̆, linh, Lêh yak pơrŏ tơ̆ Cham xă Ba Đình ‘năr 2/9 truh âu kơnh, dôm hơyak năm tơpăt, hrơ̆ch ‘lơ̆ng đơ̆ng đe linh Kanh sat đak dơsĭ ưh jor jĭ um rup ‘lơ̆ng, ‘măn đei lơ tơdrong hưch hanh, chơt hơiă lơ̆m jơhngâm đon kon pơlei lơ̆m teh đak păng bôl boăl lơ̆m apŭng plenh teh./.