Lăng truh tơbăt 100 sơnăm năr pơjing Đảng cộng sản Việt Nam (3/2/1930-3/2/2030), pơgê năr 15/1, tơ̆ Hà Nội, Hơnih bơ̆ jang Trung ương Đảng pơgơ̆r pơm lêh iung jang Tơdrong vă jang Ming hơmet păng man ‘nao Hơnih Hnam tơmoi Hồ Tây, ‘nou jĭ hơyak blŭng a vă hơnơ̆ng jang kiơ̆ rim Tơdrong vă jang Tơ iung pơjing Hơnih mong răk mŭk drăm Đảng cộng sản Việt Nam păng Tơdrong vă jang Tơplih kơsô̆ lơ̆m rim hơnih bơ̆ jang đảng. Tơ̆ pơm lêh iung jang, Tổng Bí thư Tô Lâm atŭm hăm rim Kơdră chĕp pơgơ̆r Đảng, Teh đak păng pơlei tơm Hà Nội hlôi kơtĭt kmăi pơrô̆ iung jang. Tơdrong vă jang Ming hơmet păng man ‘nao Hơnih Hnam tơmoi Hồ Tây đei iung jang, tơ iung pơjing ming man đơ̆ng rŏng keh đang gô jing hơnih pơgơ̆r rim tơdrong hop akŏm chinh trĭ lơ̆m teh đak, jang tơbôl, rim tơdrong jang kăl kơ Đảng, Teh đak; pơgơ̆r Hop akŏm tih Kơdră tang măt lơ̆m teh đak kơ Đảng; pơgơ̆r  sơng hơvơn rim khul tơmoi teh đak đe truh năm ngôi, bơ̆ jang păng pơgơ̆r rim tơdrong pơgơ̆r joh ayŏ kơdŏ soang gĭt kăl tơbăt dôm năr lêh tih kơ teh đak. ‘Nou jing hơnih ming man tôch gĭt kăl găh chinh trĭ lăng truh kơ kuh chơt hơ iă Hop akŏm tih kơ Đảng lơ̆m teh đak ‘măng mă XIV, tơgop lơ̆m atok tơ iung mŭk drăm, joh ayŏ tơpôl kơ Hơnih tơm rơbou sơnăm tơgop tih tên, pơm ‘lơ̆ng rŏ hơbŏ nhen hloh dơ̆ng kơ Việt Nam hăm bôl boăl teh đak đe.