Tổng Bí thư Tô Lâm kŭm hăm lơ kơdră chĕp kơ̆l Đảng, teh đak vang truh akŏm. 95 sơnăm âu ki, đơ̆ng ‘năr hơdăh chông trong đơ̆ng Đảng păng Ƀok Hồ nuih mơng, hơdrĕch hơdrŭng Việt Nam kơjăp yak hloh rim tơdrong mơmat tat, pơjing dôm jơnei gĭt kăl. Lơ̆m pơyan puih mak ƀĕnh tơdrong hơrih hiôk, jơhngơ̆m bơ̆n sa roi hơiă hăm đom lui, ‘mêm ‘lơ̆ng ‘măn ăn kơ Đảng hơdai hăm hơ pơi ‘meh tơ̆ hơnăp kơnh ‘lơ̆ng hơiă kơ teh đak.

Tơ̆ tơdrong jang dôm bơngai tang măt hlôi lăng dôm ƀai hơri pôk pơ ư kơ Đảng Cộng sản Việt Nam ang hơdăh, Kơdră  Hồ Chí Minh nuih mơng, pôk pơ ư kơ pơlei pơla, teh đak nhen: “Đất nước” (pơđơ̆k Tạ Hữu Yên, tơmơ̆t boa tôn reh Phạm Minh Tuấn); “Dáng đứng Việt Nam” (pơđơ̆k Lê Anh Xuân, tơmơ̆t boa tôn reh Nguyễn Chí Vũ); “Giai điệu Tổ quốc” (Trần Tiến); “Đảng đã cho ta cả một mùa xuân” (Phạm Tuyên); “Ca ngợi Hồ Chủ tịch” (Văn Cao); “Người là niềm tin tất thắng” (Chu Minh). Hăm tơdrong gơh hơgei gĭt kăl 95 sơnăm chĕp kơ̆l đơ̆ng Đảng, bơ̆n gơh chhôk ‘nă, hơnơ̆ng kơjăp đon lui lơ̆m tơdrong chĕp kơ̆l đơ̆ng Đảng vă kơjăp yak mơt lơ̆m chăl ‘nao kơ hơdrĕch hơdrŭng.