Tang măt dôm Kơdră chĕp kơ̆l Đảng, Teh đak pơjao Mê đai bơ̆jang mă Mônh ăn kơ Đảng bộ khŭl kơdră păng kon pơlei Thị xã Phước Long, Tổng Bí thư Tô Lâm tơƀôh jơhngơ̆m đon ƀlŏk hơdơ̆r gĭt kăl kơ đe Lĭnh nuih mơng lôch dŏng teh đak, kon pơlei, dôm bơngai hlôi nuih mơng iung tơblăh, hŭt hơkâu ăn tơring teh “Tơring Hơlĕch mơmat tat mă lei nuih mơng”, ăn tơdrong jang pơm rơngei - jơnei teh đak. Tổng Bí thư pôk pơ ư păng lăng ‘lơ̆ng dôm jơnei dêh char Bình Phước iŏk đei lơ̆m vă jê̆ 50 sơnăm rơngei.

Đơ̆ng 1 tơring đei anih jang kăl ưh kơ ‘lơ̆ng, jang mŭk drăm iĕ, tơdrong hơrih sa kơ kon pơlei mơmat tat, Bình Phước hlôi păng tŏk bŏk tơplih rim năr vă jing “tưk tơiung jang tŏk” kơ pơđĭ tơring. Tổng Bí thư athei tơring hơnơ̆ng hơtŏk pran kơtang đon nuih, đon hơgei, jơhngơ̆m pran đơ̆ng grŭp tơgoăt pôm nơ̆r ƀơ̆r đon đĭ đăng hơdrĕch hơdrŭng vă pơm hiôk, hơvơn păng iŏk yua jơnei rim kon jên jang lơ̆m tơpôl; tŭn hrĕnh jang ‘lơ̆ng, tơplih kơsô̆ vă hơtŏk tơiung khŭl jang pơm tơlĕch ‘nao, hơtŏk loi dơ̆ng tơgoăt hơdai tơring moi kiơ̆ hơtŏk tơiung anih jang kăl tơm; pơm lơ tơdrong jang păng hơtŏk iŏk đei jên jang; hơtŏk ‘lơ̆ng tơdrong hơrih sa ăn kon pơlei.