‘Nou jĭ nơ̆r pơrô̆ jang đơ̆ng Kơdră jang Hơnih tơm Chinh trĭ, Kơdră jang lơ̆m Ban Bí thư, Kơdră chĕp pơgơr Hơnih bơ̆ jang Dăr lăng Trung ương Trần Cẩm Tú tơ̆ Hop akŏm lơ̆m teh đak pơtôch bơ̆ jang pơrô̆ pơrôp sơnăm 2024, tơlĕch tơdrong jang lơ̆m sơnăm 2025.

Iung pơma tơ̆ hop akŏm, Kơdră chĕp pơgơ̆r Ban Bí thư Trần Cẩm Tú pơma hơdăh, sơnăm 2025 jĭ sơnăm tôch gĭt kăl-jĭ sơnăm pơđĭ lơ̆m Đảng, lơ̆m kon pơlei, ƀô̆ đô̆i kŏng ang bơn kơrŭn ,jơhngơ̆m iung jang kơtang, jang kegh đang rim trong tơlĕch jang kơ Hop akŏm tih ‘măng mă XIII hlôi tơlĕch ăn; sơnăm pơgơ̆r Hop akŏm tih kơ Đảng rim hơnih, yak truh Hop akom tih kơ ‘măng mă XIV kơ Đảng; Sơnăm blŭng jang kiơ̆ hơmet pơ ‘lơ̆ng Hơnih jang, khul jang chinh trĭ kơtoei, gơ̆h hơgei, jơnei hơ iă, pơjing hơyak pran vă teh đak mơ̆t lơ̆m chăl atŏk tơ iung ‘nao kơ hơdrĕch hơdrung. Kơ yuơ lơ loh, Kơdră chĕp pơgơ̆r Ban Bí thư pơchoh ăn lơ̆m sơnăm 2025 ou, hơnih jang Pơrô̆ pơrôp kăl tơlĕch jang kiơ̆ ‘lơ̆ng hlŏh dơ̆ng jơhngơ̆m đon trong bơ̆ jang đơ̆ng Ƀok Hô, trong bơ̆ jang đơ̆ng Đảng păng nơ̆r pơrô̆ jang đơ̆ng Tổng Bí thư Tô Lâm tơ̆ jơ bơ̆ jang ‘nao ou găh bơ̆ jang pơrô pơrôp; Hơnih jang kăl băt hlôh ƀôh hơdăh tơdrong kăl păng tơdrong pơkoel tơplih ‘nao kơtang bơ̆ jang pơrô̆ pơrôp hơtŏ hăm tơdrong jang lơ̆m jăl jang kĕch mang ‘nao vă atŏk kơtang jơhngơ̆m pran kon pơlei, jơhngơ̆m pran tơgoăt hơtoăl hơdrĕch hơdrung, ba teh đak yak mơ̆t pran kơtang lơ̆m chăl ‘nao.

Kơdră chĕp pơgơ̆r Ban Bí thư athei, pơm hơtŏk loi dơ̆ng bơ̆ jang kiơ̆ jơnei Trong bơ̆ jang pơrô̆ pơrôp kơ khul jang chinh trĭ. Atŭm hăm ‘noh, hơnơ̆ng tơplih ‘nao trong pơrô̆ pơrôp kon pơlei; tơklep kơjăp hăm tơring, băt hơdăh tơdrong; pơjing đei lơ khul, trong jang tơchă băt tơdrong, jơhngơm đon hơpơi ‘meh vă păng nơ̆r tơgop tơroi tơbăt hăm trong “lui yom kon pơlei, tơjê̆ kon pơlei, hlôh vao kon pơlei, hŏk kiơ̆ kon pơlei, bơ̆ jang ‘lơ̆ng hloh dơ̆ng ăn kon pơlei". Kơdră chĕp pơgơ̆r, bơngai chep kơ̆l rim hơnih kăl hơnơ̆ng tơƀơ̆p, pơma dơnuh, mơ̆ng, xek tơlang tơtom dôm tơdrong ưh kơ lăp đon lơ̆m kon pơlei, mă kăl tơdrong chă tơkêng, pơhoach brăh brư, sa pơgơ̆m pơjĭp ... Hơnơ̆ng bơ̆ jang ‘lơ̆ng pơrô̆ pơrôp tơ̆ tơring kon klông, kon pơlei lui khop, rim tơring đei tơdrong ưh sơđơ̆ng, tơring hơtăih yăih, tơring tơnap tap, băt hơdăh dôm tơdrong kon pơlei bơ̆n oei tơ̆ teh đak đe.

Kơdră chĕp pơgơ̆r Ban Bí thư Trần Cẩm Tú athei, Hơnih jang Pơrô̆ pơrôp tơlĕch jang kơtang rim tơdrong jang chĕp pơgơ̆r vă tơgŭm ‘lơ̆ng ăn Hop akom tih ‘măng mă XIV kơ Đảng, tơlĕch jang rim ‘măng hop akŏm chinh trĭ kơtang, hơdrol, lơ̆m păng đơ̆ng rŏng Hop akom, pơjing đei jơ ‘năr chơt hơ iă, Tơgoăt tơgoăl, tơchăr hơ iă lơ̆m kon pơlei. Kơdră chĕp pơgơ̆r Ban Bí thư tơƀôh hơdăh, trong tơlĕch jang akŏm jing mĭnh kơ Hơnih jang pơrô̆ pơrôp găn Ban Tuyên giáo Trung ương hơnơ̆ng tơlĕch jang tĕnh koăng, tơnăpo; tơlĕch ăn trong jang hơmet ming, pơm kơtoei, sơđơng ƀlep trong tơlĕch ăn; tơ iung pơjing, tơlĕch jang rim tơdrong bơ̆ jang lơ̆m sơnăm 2025 lăp đơ̆ng rŏng akŏm jing mĭnh hloi:“Bơ̆n kăl hơmet ming pơ ‘lơ̆ng hơnih jang atŭm hăm hơmet ming khul kang ƀô̆ bơ̆ jang đei jơhngơ̆m đon ‘lơ̆ng, bơ̆ jang hơgei trŏ lăp ăn tơdrong bơ̆ jang lơ̆m khei năr kơnh. Kơ yuơ lơ loh, Hơnih jang Pơrô̆ pơrôp kăl bơ̆ jang ‘lơ̆ng hloh dơ̆ng tơdrong jang pơrô̆ pơrôp lơ̆m Đảng, lơ̆m Mặt trận păng rim hơnih jang chinh trĭ tơpôl, lơ̆m rim hơnih bơ̆ jang kơ Teh đak păng khul kơdră chĕp pơgơ̆r kơtă lơ̆m hơnih jang Pơrô̆ pơrôp kơ bơ̆n hloi, kăl pơjing đei mĭnh nơ̆r ƀơ̆r đon, tơgum djru, bơ̆ jang tơbnăp vă iung jang kơtang hloh, tơgop iung jang keh đang ‘lơ̆ng bơ jang pơm kơtoei khul chĕp pơgơ̆r”.

Tơgoăt iŏk nơ̆r tơgop pơrô̆ jang đơ̆ng Kơdră chep pơgơ̆r Ban Bí thư, Kơdră chep pơgơr Hơnih Pơrô̆ pơrôp Trung ương Mai Văn Chính tơbăt, sơnăm 2025 păng jăl jang truh ou kơnh, pơđĭ lơ̆m hơnih jang kăl tơplih ‘nao tôm toong tơdrong bơ̆ jang, trong tơlĕch jang pơrô̆ pơrôp trŏ lăp ăn chăl hle. Tơdrong tơm ‘noh tơplih ‘nao trong pơrô̆ pơrôp kon pơlei, pơm hơtŏk kơtang jang kiơ̆ khoa hŏk kmăi kmŏk, tơplih kơsô̆ lơ̆m tơlĕch jang kiơ̆ rim trong bơ̆ jang pơrô̆ pơrôp:“Găh tơdrong jang đơ̆ng dang ei truh năr Hop akŏm tih ‘măng mă 14 kơ Đảng oei tôch kơ lơ,lơm ou đei hloi dôm tơdrong tơnap tap, kăl pơ koel Hơnih jang pơrô̆ pơrôp Trung ương păng khul jang pơrô̆ pơrôp rim hơnih kơrŭn kơtang hloh dơ̆ng vă bơ̆ jang ‘lơ̆ng, tơtom băt hơdăh, chă tơchĕng hơlen, pơchoh trong hăm Hơnih tơm Chinh trĭ, Ban Bí thư, rim hơnih đảng dôm trong jang ‘lơ̆ng hloh lơ̆m chĕp pơgơ̆r, pơrô̆ jang bơ̆ jang pơrô̆ pơrôp, bơ̆ jang vei lăng kon kông, vei lăng tơdrong lui khop păng atŏk kơtang tơklep hăm kon pơlei, hăm Đảng. Lơ̆m sơnăm 2025 Hơnih jang pơrô̆ pơrôp Trung ương păng khul jang pơrô̆ pơrôp rim hơnih gô kơrŭn đĭ ai jang keh đang ‘lơ̆ng tơdrong bơ̆ jang”.