‘Nou tơdrong kơtơ̆ng ang đei tơroi tơbăt tơ̆ Hop akŏm tơbăt ăn khul chih kơtơ̆ng ang pơgê năr 27/2 kơ yuơ Hơnih tơm Ƀô̆ đô̆i vei lăng sơlam teh đak iung jang hơdoi hăm Hơnih Đảng dêh char Dak Lăk pơgơ̆r. Hop akŏm vă sơkơ̆t hơdăh, pơm hơtŏk kơtang loi dơ̆ng kơ tơdrong gĭt kăl Jơnei rơngei Tây Nguyên hăm ‘măng iung tơblăh tang găn ayăt Mi, dŏng teh đak; tơchă băt hơdăh tơdrong tơm pơm ăn đei jơnei tih tên, hơlen brĕ vă kiơ̆ yok rok jơ̆ng lơ̆m bơ̆ jang tơ iung pơjing păng vei lăng Teh đak hrei ou. Adoi, pơm hơdăh hloh dơ̆ng dôm tơdrong iŏk đei jơnei kơ Đang ƀô̆, khul kơdră chĕp pơgơ̆r păng kon pơlei rim hơdrung Tây Nguyên pơma atŭm păng dêh char Dak Lăk pơma hơdrô̆ đơ̆ng rŏng 50 sơnăm hơmet pơ ‘lơ̆ng tơdrong hiong răm đơ̆ng tơblăh vang pơm ăn, kiơ̆ yok tơdrong kăp gĭt rơngei hiôk hian păng jơhngơ̆m đon kơrŭn đĭ ai kơ Jơnei rơngei Tây Nguyên sơnăm 1975 mơ̆t lơ̆m tơdrong jang tơplih ‘nao. Hơnơ̆ng kiơ̆ yok rok jơ̆ng tơdrong oei sa joăt joe ‘lơ̆ng rŏ hơdrech hơdrung păng rơvơn đei kơ dêh char, pơm hơtŏk jơhngơ̆m đon păng hơpơi ‘meh vă lơ̆m chăl ‘nao kơ hơdrĕch hơdrung, tơ iung pơjing tơring kăl Tây Nguyên păng dêh char Dak Lăk roi năr roi pơdrŏng ‘lơ̆ng liĕm, gơh hơgei.