VOV4.Bahnar - ‘Năr 25/5, Anih vei lăng jang pơ gang dêh char Lâm Đồng ăn tơ băt, đei 241 ‘nu bơ ngai ƀơm truh bơ ngai jĭ 3141 ưh đei pơ rang jĭ Covid-19 lơ̆m ‘măng set hơ len jĭ mă 3. Lơ̆m kơ sô̆ âu, đei 121 ‘nu bơ ngai hlôi asong lĕch đơ̆ng anih oei hơ drô̆ vih tơ̆ hnam, oei hơ drô̆ lơ̆m 7 năr dơ̆ng kiơ̆ tơ drong hơ găt.

Khul jang kơ pal oei pơm hla ar ăn dôm bơ ngai oei hơ drô tôm năr bơih brŏk tơ̆ hnam

Dang ei Lâm Đồng oei ăn oei hơ drô̆ 355 ‘nu bơ ngai, lơ̆m nŏh đei 152 ‘nu bơ ngai ƀơm truh bơ ngai jĭ 3141, oei đei dơ̆ng ‘nŏh dôm bơ ngai truh đơ̆ng tơ ring đei jĭ mât tơ̆ Lâm Đồng. Lơ̆m kơ sô̆ âu, đei 21 ‘nu bơ ngai oei hơ drô̆ tơ̆ anih jang pơ gang, 259 ‘nu bơ ngai mât oei tơ̆ anih atŭm păng 75 ‘nu bơ ngai oei hơ drô̆ tơ̆ hnam.

Kiơ̆ Anih vei lăng jang pơ gang dêh char Lâm Đồng, mă đơ̆ng Lâm Đồng tam mă đei bơ ngai jĭ Covid-19 yơ, mă lei tơ̆ hơ năp tơ drong krê hơ mơt đơ̆ng jĭ, dôm trong tang găn jĭ oei hơ nơ̆ng đei dôm anih jang kơ pal tơ̆ Lâm Đồng tơ lĕch jang ‘lơ̆ng. Lơ̆m nŏh, dêh char hlôi hơ met lơ trong kơ chăng tang găn jĭ tơ dăh đei.

Dơ̆ng: Tơ blơ̆