VOV4.Bahnar – Pơgê năr 13/10, dêh char Lâm Đồng băt đei 19 'nu ƀơm jĭ Covid-19 'nao, lơ̆m noh đei 10 'nu đei băt tơ̆ anih hơbuh jĭ lơ̆m pơlei pơla. Kiơ̆ chă hơlen adrol kơ ƀet vaccine bơ̆ng jĭ Covid-19 tơ̆ minh anih ƀet bơ̆ng ăh thĭ trâ̆n Liên Nghĩa, apŭng Đức Trọng, khul kơpal kơ dêh char Lâm Đồng hlôi băt đei 3 'nu ƀơm jĭ SARS-CoV-2.

Tenh kuăng chă hơlen, pơkăp tơring, iŏk hơlen test renh hăm dôm bơngai đei tơrĕk tơ̆ anih oei xa kơ 3 'nu âu noh thôn Pré, xăh Phú Hội, apŭng Đức Trọng, truh pơgê năr 13/10, khul kơpal xơkơ̆t đei 10 'nu ƀơm jĭ Covid-19 tơ̆ anih hơbuh pơrang jĭ âu. 'Nguaih kơ noh, lơ̆m 24 jơ kơ âu, dêh char Lâm Đồng oei băt đei 9 'nu nai ƀơm jĭ Covid-19. Lơ̆m noh, đei 3 'nu noh F1 đei tơrĕk hăm anih hơbuh pơrang jĭ tơ̆ pơlei jang pơkao Vạn Thành, phương 5, plei tơm Đà Lạt. Dôm bơngai jĭ nai đei ƀôh băt tơ̆ thĭ trâ̆n Liên Nghĩa, apŭng Đức Trọng păng minh ƀar bơngai nai noh chôt vih đơ̆ng tơring hơbuh jĭ Đồng Nai păng plei tơm HCM.

Lan chih păng pơre nơ̆r