VOV4.Bahnar - Dêh char Lâm Đồng hơ nơ̆ng đei dơ̆ng 2 ‘nu bơ ngai jang pơ gang jĭ covid 19. 2 ‘nu bơ ngai jang pơ gang đei băt hơ dăh jĭ Covid-19, mĭnh ‘nu bơ̆ jang tơ̆ khoa Nội A, Hnam pơ gang Đa khoa dêh char Lâm Đồng păng bơ ngai uơ oei dơ̆ng ‘noh bơ ngai jang pơ gang kơ apŭng Di Linh. Hơ tŏk akŏp kơ sô̆ bơ ngai jang pơ gang bơ̆ jang tơ̆ dêh char Lâm Đồng jĭ Cocid-19 tŏk 5 ‘nu, lơ̆m noh găh lơ đei chă ƀôh tơ̆ pơ lei tơm Đà Lạt. ‘Ngoăih kơ ‘noh, 1 ‘nu kang ƀô̆ linh kon pơ lei nai kŭm đei jĭ Covid-19 ƀơ̆t tŏk bŏk vang jang tơ drong jang tang găn jĭ hơ buh. Jô̆ truh khei ‘năr âu, Lâm Đồng đei 2.556 ‘nu jĭ Covid-19, lơ̆m noh đei 8 ‘nu lôch păng 676 ‘nu đei hơ met klăih păng ƀrŏk đơ̆ng hnam pơ gang. Kơ sô̆ bơ ngai jĭ lơ ‘noh pơ lei tơm Đà Lạt hăm 606 ‘nu, đang kơ ‘noh apŭng Đức Trọng 590 ‘nu. 2 apŭng đei kơ sô̆ bơ ngai jĭ Covid-19 tŏ sĕt hloh kơ dêh char Lâm Đồng ‘noh Cát Tiên 18 ‘nu păng Lạc Dương 16 ‘nu.

Thuem: Tơ Blơ̆