VOV4.Bahnar - Truh pơ gê  ‘năr 8/7, dêh char Lâm Đồng băt hơ dăh đei dơ̆ng 3 ‘nu jĭ ‘nao, hơ tŏk akŏp đĭ đăng kơ sô̆ bơ ngai jĭ Covid-19 kơ dêh char tŏk 9 ‘nu. ‘Ngoăih kơ 6 ‘nu jĭ Covid-19 đei chă ƀôh hơ drol ‘noh tơ̆ apŭng Đạ Tẻh, anih đei jĭ ‘nao âu ‘noh 3 ‘nu oei sa păng bơ̆ jang tơ̆ apŭng Đơn Dương, đei băt hơ dăh đei jĭ SARS-CoV-2 ƀơ̆t vang năm tơ̆ Hnam pơ gang đa khoa Lâm Đồng hơ len lăng pham.

Hnam pơ gang Đa khoa Lâm Đồng, anih 3 ‘nu jĭ ‘nao năm hơ len lăng păng ăn ƀôh đei jĭ Covid-19

Mă hơ dăh ‘noh, lơ̆m pơ gê ‘năr 7/7, pơ đĭ 3 ‘nu âu hao gre ô tô kơ dih đơ̆ng apŭng Đơn Dương năm tơ̆ Hnam pơ gang đa khoa dêh char Lâm Đồng (tơ̆ pơ lei tơm Đà Lạt) vă hơ len lăng hrĕnh Covid-19 păng ăn ƀôh đei jĭ. Đơ̆ng rŏng ‘noh, Anih vei lăng tơ drong jĭ jăn dêh char Lâm Đồng iŏk pham hơ len lăng hăm ki thuơ̆t RT-PCR păng kŭm ăn ƀôh đei jĭ SARS-CoV-2 lơ̆m gơ măng ‘năr 7/7. Đơ̆ng rŏng kơ chă ƀôh dôm bơ ngai âu đei jĭ Covid-19, kơ tă lơ̆m gơ măng ‘năr 07/7, Anih vei lăng găh jang pơ gang dêh char Lâm Đồng hlôi tơ lĕch tơ roi tơ băt hăt hot tơ chă bơ ngai ƀơm truh, hơ dai hăm ‘noh tơ lĕch jang tơ drong jang tơ chă. Truh pơ gê ‘năr 8/7, khŭl jang kơ pal hlôi tơ chă, ăn oei hơ drô̆ đei 85 F1 păng 265 F2.

Thuem: Tơ blơ̆