VOV4.Bahnar - Pơ gê 11/7, dêh char Lâm Đồng roi tơ băt đei dơ̆ng 1 ‘nu bơ ngai jĭ Covid-19, hơ tŏk đĭ đăng kơ sô̆ bơ ngai jĭ tơ̆ Lâm Đồng truh dang ei ‘nŏh 11 ‘nu. Bơ ngai jĭ Covid-19 ‘nao âu ‘nŏh jĭ bơ ngai jĭ kơ ssô̆ 28479, drŏ kăn jang tơ̆ anih mong jên Agribank tơ̆ apŭng Đơn Dương. Ƀơm truh bơ ngai jĭ Covid-19 âu, dêh char Lâm Đồng hlôi chă đei hlŏh 90 ‘nu bơ ngai F1 păng 700 ‘nu bơ ngai F2.

Apŭng Đơn Dương bơ̆ jang kiơ̆ trong pơ vang găn hăm plei Tân Lập, xăh Lạc Lâm păng jơ̆p thĭ trơ̆n Thạnh Mỹ

Anih vei lăng tơ drong jĭ jăn dêh char Lâm Đồng oei jang hơ doi hăm dôm apŭng Đơn Dương, Đức Trọng păng plt Đà Lạt vă tơ chă bơ ngai jĭ, chĕng găn tơ ring, set hơ len jĭ. Adrol kơ ‘nŏh, vă pơm ‘lơ̆ng ăn tơ drong tang găn jĭ, ưh ăn jĭ tơ pŏh xă, dêh char Lâm Đồng đei nơ̆r kâm ưh ăn yak vih vât mât lĕch lơ̆m apŭng Đơn Dương kiơ̆ tơ drong hơ găt 16 đơ̆ng Thủ tướng tĕh đak. Tơ ring ưh ăn mât lĕch ‘nŏh plei Tân Lập, xăh Lạc Lâm păng đĭ đăng thĭ trơ̆n Thạnh Mỹ kơ apŭng Đơn Dương, khei ‘năr kâm tŏ sĕt hlŏh ‘nŏh 14 năr iŏk đơ̆ng tŏk bŏk măng ‘năr 11/7 truh đei nơ̆r roi tơ băt ‘nao dơ̆ng.

Dơ̆ng: Tơ blơ̆